ԵՐԵՎԱՆ, 18 ԱՊՐԻԼԻ, ՆՈՅՅԱՆ ՏԱՊԱՆ: «Արդշինինվեստբանկ»-ը 2005թ.-ին աննախադեպ աճ է արձանագրել բոլոր ցուցանիշների գծով` ՀՀ բանկային համակարգում դրանցով զբաղեցնելով առաջին եւ երկրորդ տեղերը: Ինչպես ապրիլի 18-ի ասուլիսում հայտնեց բանկի վարչության նախագահ Արամ Անդրեասյանը, հաշվետու տարում «Արդշինինվեստբանկ»-ի ակտիվների ծավալը 2004թ.-ի համեմատ աճել է 42%-ով եւ կազմել մոտ 54,3 մլրդ դրամ, ինչը կազմում է ՀՀ բանկային համակարգի ընդհանուր ակտիվների 12,04%-ը: Բանկի ընդհանուր կապիտալը աճել է 63,3%-ով եւ կազմել 88,8 մլրդ դրամ, իսկ պարտավորությունները աճել են 38,5%-ով եւ կազմել մոտ 45,4 մլրդ դրամ: Բանկի զուտ շահույթը ավելացել է 56,9%-ով եւ կազմել 2,3 մլրդ դրամ: «Արդշինինվեստբանկ»-ի վարկային ներդրումները 2005թ.-ին կազմել 25,2 մլրդ դրամ, ինչը նախորդ տարվա ցուցանիշից մոտ 35%-ով ավելի է: Ա.Անդրեասյանի խոսքերով, հատկանշական է սպառողական վարկերի ծավալները զգալի աճը: Միայն «Արդշինինվեստբանկ»-ում դրանք հաշվետու տարում աճել են 23%-ով եւ կազմել 9,4 մլրդ դրամ: Ըստ բանկի վարչության նախագահի, դա վկայում է, որ բնակչության 30-35%-ի ֆինանսական վիճակը բարելավվել է: Նշվեց նաեւ, որ բանկը առաջին տեղն է զբաղեցնում ֆիզիկական եւ իրավաբանական անձանցից ներգրաված ժամկետային ավանդների ծավալով, ինչը, Ա.Անդրեասյանի խոսքերով, վկայում է բանկի նկատմամբ բնակչության վստահության մասին: Անդրադառնալով վարկերի բարձր տոկոսադրույքների խնդրին, Ա.Անդրեասյանը նշեց, որ միջազգային շուկաներում ֆինանսական ռեսուրսների գները բարձրացել են: Մաիժամանակ նա հավաստիացրեց, որ չնայած այդ հանգամանքին վարկերի տոկոսադրույքները Հայաստանում շարունակում են նվազել: 2005թ.-ի ադյունքներով «Արդշինինվեստբանկ»-ը հանդիսացել է նաեւ ամենախոշոր հարկատու բանկը: Բոլոր հարկատեսակների գծով բանկը պետական բյուջե է վճարել մոտ 1 մլրդ դրամ (մոտ 2,22 մլն ԱՄՆ դոլար): Ներկայումս «Արդշինինվեստբանկ»-ը ունի 49 մասնաճյուղ (երկուսը ԼՂՀ-ում) եւ մեկ ներկայացուցչություն Փարիզում:

---