ԵՐԵՎԱՆԻ ՀՈՎՀԱՆՆԻՍՅԱՆ ՓՈՂՈՑԻ ՇԵՆՔԵՐԻՑ ՄԵԿՈՒՄ ՀԱՅՏՆԱԲԵՐՎԵԼ Է
80-ԱՄՅԱ ՏՂԱՄԱՐԴՈՒ ԴԻԱԿ
03-04-2006 19:12:00 | Հայաստան | Հասարակություն
ԵՐԵՎԱՆ, 3 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 1-ին ժամը 16:35-ի
սահմաններում Աշտարակի հիվանդանոցից ահազանգ է ստացվել, որ օձի
խայթոցով իրենց է դիմել Արագածոտնի մարզի Փարպի գյուղի բնակիչ,
1962թ.-ին ծնված Լ.Գյուլնազարյանը: Սակայն անհրաժեշտ օգնությունը
ցույց տալու համար հիվանդանոցում հակաթույն չի եղել: Տուժածը
անմիջապես տեղափոխվել է Երեւանի «Արմենիա» բժշկական կենտրոնի սուր
թունավորումների բաժանմունք, որտեղ էլ նրան ներկարկվել է Հայաստանի
փրկարար ծառայության ճգնաժամային կառավարման կենտրոնի օպերատիվ
խմբի տրամադրած հակաթույնը: Ըստ բժիշկների, Լ.Գյուլնազարյանի
առողջական վիճակը միջին ծանրության է:
Ըստ ՀՀ Տարածքային կառավարման նախարարության Փրկարարական
ծառայության ամփոփագրի, ապրիլի 2-ին ժամը 20:45-ի սահմաններում
ահազանգ է ստացվել, որ Երեւանի Հովհաննիսյան փողոցի 8-րդ շենքի
բնակարաններից մեկի դուռն երկար ժամանակ է, ինչ չի բացվում: Դեպքի
վայր մեկնած փրկարարները դուռը բացելով, հայտնաբերել են 80-ամյա
Ա.Հովհաննիսյանի դիակը: Հարուցվել է քրեական գործ: