ԵՐԵՎԱՆ, 20 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Ավարտվել են ֆրանսահայ կինոռեժիսոր Ռոբեր Գեդիկյանի նոր` «Ճանապարհորդություն դեպի Հայաստան» ֆիլմի երեւանյան նկարահանումները: Ֆիլմի եզրափակիչ նկարահանումները կկատարվեն Ֆրանսիայում` Մարսելում, իսկ առաջին ցուցադրությունը կկայանա հաջորդ տարվա ապրիլին` Փարիզում: Հայ հանդիսատեսը կինոնկարը կկարողանա դիտել միայն 2006 թ. ամռանը` հուլիսի 14-ին «Ոսկե ծիրան» կինոփառատոնի շրջանակում: Ֆիլմում նկարահանվել են շուրջ 20 հայ դերասաններ: Ինչպես սեպտեմբերի 20-ի ասուլիսում հայտնեց Ռոբեր Գեդիկյանը, ֆիլմի ստեղծման գաղափարն առաջացել էր մեկ տարի առաջ, երբ ինքը կնոջ` ֆրանսիացի հայտնի դերասանուհի Արիան Ասկարիդի հետ Հայաստան էր եկել` մասնակցելու «Ոսկե ծիրան» առաջին միջազագային կինոփառատոնին: Նոր կինոնկարի սցենարի հեղինակը, ինչպես նաեւ գլխավոր հերսուհու` Աննայի դերակատարը Արիան Ասկարիդն է: Դերասանուհու խոսքերով, այս ֆիլմը հայրենիքից հեռու ապրող հայերի մասին է, որոնք ապրելով օտարության մեջ, այնուամենայնիվ, չեն կորցրել իրենց ազգային հատկանիշները, ամբողջովին չեն տարրալուծվել այլ մշակույթի ու կենցաղի մեջ: «Այս թեման նեղ ազգային չէ, սա համամարդկային թեմա է. այն որքանով որ առնչվում է հայի հետ, նույնքանով էլ` իտալացու, գերմանացու, իսպանացու եւ մյուս այլ ազգերի հետ, քանի որ ինքնության պահպանության խնդիրը գոյություն է ունեցել բոլոր ժամանակներում»,- ընդգծեց Արիան Ասկարիդը: Ֆրանսիացի դերասանուհին գտնում է, որ ոչ մի տարբերություն չկա հայ կամ ֆրանսիացի դերասանների միջեւ, կան պարզապես լավ կամ վատ դերասաններ: Դերասանուհու խաղընկերը եղել է ազգությամբ հայ, Արտաշատի Դրամատիկական թատրոնի դերասան Ռոմեն Ավինյանը: «Մենք երկուսս խոսում էինք տարբեր լեզուներով, սակայն դա չխանգարեց մեր աշխատանքին. մենք հասկանում էինք իրար հայացքներով եւ ժեստերով»,- նշեց դերասանուհին: Ֆիլմի մյուս գլխավոր դերակատարը` ազգությամբ ֆրանսիացի Ժերար Մելանը նկարահանվել է հայի կերպարում: Նա նշեց, որ սկզբում իրեն դժվար էր խաղալ այդ դերում, քանի որ ծանոթ չէր հայկական իրականությանը, սակայն կարճ ժամանակ անց հաղթահարվել է նաեւ այդ խոչընդոտը: «Այս երկրում ես տեսա մեծ մարդասիրություն: Այստեղ ես գտա մարդկային ու պարզ հարաբերություններ, որը չեմ տեսել շատ երկրներում: Ես հիմա ավելի շատ հայացա, քան նկարահանումների սկզբում»,- նշեց Մելանը:

---