ՍԱՔՍՈՆԻԱ-ԱՆՀԱԼԹ ԵՐԿՐԱՄԱՍԻ ՄՇԱԿՈՒՅԹԻ ՆԱԽԱՐԱՐԻՆ ԸՆԴՈՒՆԵԼ Է ՀՀ
ԱԳ ՆԱԽԱՐԱՐԸ
05-09-2005 21:05:00 | Հայաստան | Մշակույթ
ԵՐԵՎԱՆ, 5 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Սեպտեմբերի 3-7-ը Հայաստանում անցկացվող Գերմանիայի
Սաքսոնիա-Անհալթ երկրամասի մշակութային շաբաթի մասին է պատմել
երկրամասի մշակույթի նախարար Յան-Հենդրիկ Օլբերտցը սեպտեմբերի 5-ին
Հայաստանի ԱԳ նախարար Վարդան Օսկանյանի հետ հանդիպմանը: Շաբաթի
շրջանակում անցկացվում են համերգներ, ցուցահանդեսներ,
կինոցուցադրումներ, ինչպես նաեւ հայ-գերմանական գիտաժողով`
պատմաբանների եւ հայագետների մասնակցությամբ:
Կողմերը գոհունակություն են հայտնել մշակույթի, կրթության եւ
գիտության բնագավառներում երկկողմ արդյունավետ համագործակցության
առնչությամբ, որին էապես նպաստել են այդ ոլորտների վերաբերյալ
ստորագրված մի շարք երկկողմ իրավական փաստաթղթեր:
ՀՀ ԱԳ նախարարը բարձր է գնահատել գիտնականների, ուսանողների,
ուսուցիչների եւ դպրոցականների միջեւ իրականացվող փոխանակումների
բազմազան ծրագրերը: Հատուկ նշվել է Գերմանիայի ակադեմիական
փոխանակման ծառայության (DAAD) արդյունավետ գործունեությունը:
Ինչպես «ՆՈՅՅԱՆ ՏԱՊԱՆ»-ին հայտնում են ՀՀ ԱԳՆ մամուլի եւ
տեղեկատվության վարչությունից, Սաքսոնիա-Անհալթի երկրամասի
մշակույթի նախարարի Հայաստան այցի ընթացքում նախատեսված են
հանդիպումներ Ամենայն Հայոց Գարեգին Բ կաթողիկոսի, մշակույթի եւ
երիտասարդության հարցերի նախարար Հովիկ Հովեյանի, կրթության եւ
գիտության նախարար Սերգո Երիցյանի հետ: Այցի ընթացքում նախատեսված
է ստորագրել «Համատեղ հայտարարություն ՀՀ մշակույթի եւ
երիտասարդության հարցերի նախարարության, ՀՀ կրթության եւ գիտության
նախարարության եւ Սաքսոնիա-Անհալթ երկրամասի մշակույթի, գիտության
եւ կրթության նախարարության միջեւ` մշակույթի, կրթության եւ
գիտության բնագավառներում համագործակցության մասին»: