ԵՐԵՎԱՆ, 31 ՕԳՈՍՏՈՍԻ, ՆՈՅՅԱՆ ՏԱՊԱՆ: Սոֆիայում անցկացված
ծանրամարտի Եվրոպայի պատանեկան առաջնությունում Հայաստանի
մարզիկները թիմային հաշվարկում գրավել էին 2-րդ տեղը, իսկ
անհատապես երկամարտում եւ առանձին վարժություններում նվաճել տարբեր
հարգի 20 մեդալ:
Օգոստոսի 31-ին ՀՀ Սպորտպետկոմիտեում կայացած հանդիպման
ժամանակ ՀԱՕԿ-ի նախագահ Գագիկ Ծառուկյանը, Սպորտկոմիտեի նախագահ
Իշխան Զաքարյանը, ծանրամարտի հանրապետական ֆեդերացիայի նախագահ
Շահեն Հովասափյանը շնորհավորեցին պատանի ծանրորդներին, նրանց
մարզիչներին, ցանկացան նորանոր հաջողություններ: Միաժամանակ ՀԱՕԿ-ի
նախագահը պարգեւավճարներ հանձնեց նրանց: Պարգեւատրվեցին Եվրոպայի
չեմպիոններ Տիգրան Մարտիրոսյանը, Մելինե Գալուզյանը, 2-րդ
մրցանակակիրներ Դավիթ Մուրադյանը, Սեւակ Սահակյանը, Ռուբեն
Մամոյանը, Արամ Անդրիկյանը, Աղվան Մելիքյանը, Աննա Գովելյանը,
ինչպես նաեւ պատանեկան հավաքականի ավագ մարզիչներ Աշոտ Խաչատրյանը,
Օգսեն Միրզոյանը, ծանրորդների անձնական մարզիչները: Հայկական
սպորտի ղեկավարները հույս հայտնեցին, որ այսօր պատանեկան
մրցումներում հաջողությունների հասած մարզիկներն ապագայում բարձր
մակարդակով հանդես կգան նաեւ մեծահասակների աշխարհի ու Եվրոպայի
առաջնություններում, օլիմպիական խաղերում: