ԵՐԵՎԱՆ, 24 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 24-ին ամփոփվեցին հանրային առողջության հարցերում բնակչության տեղեկացվածության բարձրացմանն ուղղված ՀՀ Առողջապահության նախարարության եւ UMCOR-ի առաքելության իրականացրած ծրագրի արդյունքները: Ծրագիրն արժանացավ Հայաստանի առողջապահության նախարարության բարձր գնահատականին: Երկու տարում թողարկվել է 10 հազարական օրինակ տեղեկատվական գրքույկ ու թերթիկ, անցկացվել է 10 հեռուստատեսային հաղորդում, կազմակերպվել են ճանաչողական ուղեւորություններ Հայաստանի մարզեր: Նշվեց, որ բնակչության մեջ առանձնահատուկ հաջողություն են վայելում տեղեկատվական թերթիկները, որտեղ մանրամասն լուսաբանվում են բնակչության անվճար կամ մասամբ վճարովի բժշկական սպասարկման եւ դեղորայք ստանալու իրավունքները: «ՆՈՅՅԱՆ ՏԱՊԱՆ»-ի թղթակցի հետ զրույցի ժամանակ առողջապահության նախարարի խորհրդական Ռուսլանա Գեւորգյանը հույս հայտնեց, որ տվյալ ծրագիրը կշարունակվի, քանի որ հայտնվում են նոր առողջապահական ծրագրեր, որոնց մասին բնակչությունը նույնպես պետք է տեղեկացված լինի:

---