«ՋԱԶԻ ԳՈՒՅՆԵՐԸ» ՆԿԱՐՉԱԿԱՆ ՄՐՑՈՒՅԹ-ՑՈՒՑԱՀԱՆԴԵՍՈՎ ԵՐԵՎԱՆՈՒՄ
ՄԵԿՆԱՐԿԵՑ ՋԱԶԻ ՓԱՌԱՏՈՆԸ
08-04-2005 15:46:00 | Հայաստան | Մշակույթ
ԵՐԵՎԱՆ, 8 ԱՊՐԻԼԻ, ՆՈՅՅԱՆ ՏԱՊԱՆ: Հայաստանում ԱՄՆ դեսպանատան
կազմակերպած ջազի փառատոնը մեկնարկեց ապրիլի 8-ին «Ջազի գույները»
նկարչական մրցույթ-ցուցահանդեսով, որին մասնակցեցին Երեւանի
Գեղարվեստի ակադեմիայի եւ Փանոս Թերլեմեզյանի անվան նկարչական
ուսումնարանի սաները:
Արդեն չորրորդ տարին Հայաստանի Նկարիչների միությունում (ՀՆՄ)
անցկացվող մրցույթի մասնակիցները ջազային երաժշտության հնչյունների
ներքո փորձում են պատկերել ջազը գույներով:
Մրցույթի բոլոր մասնակիցները ԱՄՆ դեսպանատան կողմից ստացան
սերտիֆիկատներ, ձայնասկավառակներ, իսկ Հայաստանի Նկարիչների
միության կողմից` նկարչական պիտույքներ:
Հայաստանում ԱՄՆ փոխդեսպան Էնթընի Գոֆրիի խոսքերով, չորրորդ
տարին անցկացվող այս մրցույթը վկայում է այն մասին, որ Հայաստանում
ոչ միայն հաստատավել է ջազը, այլեւ տարեցտարի ավելանում են ջազի
սիրահարները: Ըստ նրա, ջազի փառատոնի նպատակն է հասարակության
ուշադրությունը բեւեռել ջազի յուրօրինակ ժառանգությանն ու
պատմությանը, ցույց տալ դրա կարեւորությունը` որպես կենդանի
ամերիկյան արվեստ ու ազգային մշակութային գանձ: Է. Գոֆրին նշեց, որ
«Ջազի նշանավորման ամիսը» նշվում է ԱՄՆ-ում, իսկ 2003 թ.-ից
ամերիկյան Կոնգրեսը սկսել է պաշտպանել այն միջազգայնորեն նշելու
բոլոր նախաձեռնությունները:
Ջազի օրերի շրջանակում Հայաստանում կկազմակերպվեն համերգներ,
սվինգ պարահանդես, իսկ Հայաստանի Ազգային պատկերասրահում կբացվի
ջազի եւ բլյուզի մասին պատմող ֆիլմերի շաբաթ: Դեսպանատան հրավերով
Հայաստան կժամանեն ամերիկյան ջազային երաժիշտներ, այդ թվում Ֆրանկ
Ամսալեմի հեղինակավոր քառյակը, երգչուհի Սառա Լազուրսկին, ինչպես
նաեւ Օթար Մագրաձեի քառյակը` Թբիլիսիից: