ՊԱՏՄԱՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ԳԻՏԱՀԵՏԱԶՈՏԱԿԱՆ ԿԵՆՏՐՈՆԸ
ԿԿԱԶՄԻ ԱՐՏԵՐԿՐՈՒՄ ԳՏՆՎՈՂ ՀԱՅԿԱԿԱՆ ՀՈՒՇԱՐՁԱՆՆԵՐԻ ՑՈՒՑԱԿՆԵՐԸ
18-01-2005 17:40:00 | Հայաստան | Մշակույթ
ԵՐԵՎԱՆ, 18 ՀՈՒՆՎԱՐԻ, ՆՈՅՅԱՆ ՏԱՊԱՆ: Պատմամշակութային
ժառանգության գիտահետազոտական կենտրոնը կազմել է Շիրակի եւ Տավուշի
մարզերի պատմամշակութային հուշարձանների պետական ցուցակը, որ
հաստատվել է ՀՀ կառավարության կողմից: Ինչպես «ՆՈՅՅԱՆ ՏԱՊԱՆ»-ի
թղթակցին հայտնեց կենտրոնի տնօրեն Հակոբ Սիմոնյանը, այս տարի
կառավարությանը կներկայացվի նաեւ Սյունիքի մարզի պատմամշակութային
հուշարձանների ցուցակը:
Հակոբ Սիմոնյանի խոսքերով, Շիրակի մարզի հուշարձանների
ցուցակում ընդգրկվել է 2334 հուշարձան, այն դեպքում, երբ 1983 եւ
1986 թթ. կազմված պետական ցուցակներում դրանց թիվը հասնում էր
700-800-ի: 2004 թ. պետական ցուցակում ընդգրկվել են 19-րդ դարի
վերջին եւ 20-րդ դարի սկզբին Գյումրիում կառուցված բնակելի,
հասարակական, մոնումենտալ կառույցները:
Տավուշի մարզում գրանցվել է 1996 հուշարձան:
Ուսումնասիրությունների արդյունքում հայտնաբերվել են հնագիտական
հուշարձաններ, դամբարանադաշտեր, հնագույն ամրոցներ, բրոնզեդարյան
բնակատեղիներ, վաղ եւ միջնադարյան կոթողային հուշարձաններ: Պետական
ցուցակում ներառվել են Իջեւան քաղաքի մոնումենտալ քանդակները,
որոնք կերտվել են տարբեր երկրների ճանաչված քանդակագործների
կողմից:
Պատմամշակութային ժառանգության գիտահետազոտական կենտրոնի
տնօրենը կարեւորում է հուշարձանների պետական ցուցակների կազմումը,
քանի որ հողերի սեփականաշնորհման պատճառով դրանք կարող են
կործանվել:
Հակոբ Սիմոնյանը նշեց, որ ավարտելով ՀՀ պատմամշակութային
հուշարձանների պետական ցուցակների կազմման աշխատանքները, կենտրոնը
պետք է կազմի արտերկրի` Ռուսաստանի, եվրոպական երկրների, ԱՄՆ-ի,
ինչպես նաեւ պատմական Հայաստանի տարածքում գտնվող հայկական
պատմամշակութային հուշարձանների ցուցակները: