ԵՐԵՎԱՆ, 8 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի ֆուտբոլի
ֆեդերացիայի գործադիր կոմիտեի դեկտեմբերի 7-ի նիստում ի թիվս այլ
հարցերի քննվել է Գյումրիի «Շիրակ» ֆուտբոլային ակումբի դիմումը:
Նրանում խնդրվում է հաշվի առնել, որ «Շիրակն» իրեն լավագույնս է
դրսեւորել հանրապետության բոլոր առաջնություններում, միշտ գրավել է
մրցանակային տեղեր, Շիրակի մարզի եւ Գյումրի քաղաքի միակ թիմն է
բարձրագույն խմբում, ունի ֆուտբոլային հարուստ ավանդույթներ, եւ
թույլատրել մասնակցելու բարձրագույն խմբի առաջնությանը:
Հայաստանի ֆուտբոլի ֆեդերացիայի նախագահ Ռուբենը Հայրապետյանը
գործադիր կոմիտեին առաջարկել է քննարկել բարձրագույն խմբի թիմերի
քանակը մեկով ավելացնելու հարցը, նկատի ունենալով, որ ֆուտբոլի
զարգացման անհրաժեշտությունից եւ առաջնության մրցունակությունից
ելնելով տարեցտարի անհրաժեշտ է ավելացնել բարձրագույն խմբի թիմերի
քանակը:
Ինչպես «ՆՈՅՅԱՆ ՏԱՊԱՆ»-ին հայտնեցին Հայաստանի ֆուտբոլի
ֆեդերացիայի Մամուլի քարտուղարությունից, քննարկման արդյունքում
գործադիր կոմիտեն հավանություն է տվել այդ առաջարկին: