ՈՐՈՇՎԵԼ ԵՆ ՇԱԽՄԱՏԻ ԱՇԽԱՐՀԻ ԱՌԱՋՆՈՒԹՅԱՆ ՀԱՎԱԿՆՈՐԴՆԵՐԻ
ՄՐՑԱԽԱՂԵՐԻ ԶՈՒՅԳԵՐԸ
12-01-2006 20:35:00 | Հայաստան | Սպորտ
ԵՐԵՎԱՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ: Շախմատի աշխարհի
առաջնությունը, մարզաձեւի միջազգային ֆեդերացիայի որոշմամբ,
անցկացվելու է նոր մրցակարգով: Համաձայն դրա, չեմպիոնը որոշվելու է
մի քանի փուլով` 2007 թվականին: Իսկ մինչ այդ 16 շախմատիստներ,
որոնցից 10-ն ընտրվել են Խանտի Մանսիյսկում անցկացված աշխարհի
գավաթի խաղարկությունում, կանցկացնեն հավակնորդների մրցախաղեր:
Շախմատի միջազգային ֆեդերացիան հրապարակել է հավակնորդների 8
զույգերի ցուցակը: Զույգերը որոշվել են շախմատիստների անհատական
վարկանիշներին համապատասխան: 1-ին փուլում կմրցեն Լեւոն Արոնյան
(Հայաստան) - Մագնուս Կառլսեն (Նորվեգիա), Պետեր Լեկո (Հունգարիա)
- Միխայիլ Գուրեւիչ (Թուրքիա), Ռուսլան Պոնոմարյով (Ուկրաինա) -
Սերգեյ Ռուբլեւսկի (Ռուսաստան), Բորիս Գելֆանդ (Իսրայել) - Ռուստամ
Կասիմջանով (Ուզբեկստան), Էթիեն Բաքրո (Ֆրանսիա) - Գատա Կամսկի
(ԱՄՆ), Ալեքսանդր Գրիշչուկ (Ռուսաստան) - Վլադիմիր Մալախով
(Ռուսաստան), Հուդիթ Պոլգար (Հունգարիա) - Եվգենի Բարեեւ
(Ռուսաստան), Ալեքսեյ Շիրով (Իսպանիա) - Մայքլ Ադամս (Անգլիա)
զույգերը:
Հաղթողները, բաժանվելով զույգերի, կանցկացնեն նոր մրցախաղեր
եւ կորոշեն 4 լավագույններին: Այս փուլում բոլոր մրցախաղերը
բաղկացած կլինեն 6 պարտիաներից: Հավակնորդների մրցախաղերը, ամենայն
հավանականությամբ, կանցկացվեն 2006թ.-ի ընթացքում: Մրցավայրը եւ
ժամկետները հայտնի կդառնան առաջիկայում:
Հավակնորդների մրցախաղերի 4 հաղթողներն այնուհետեւ աշխարհի
նախորդ առաջնության 4 լավագույնների` Վեսելին Թոփալովի
(Բուլղարիա), Վիշվանաթան Անանդի (Հնդկաստան), Պյոտր Սվիդլերի եւ
Ալեքսանդ Մորոզեւիչի (երկուսն էլ` Ռուսաստան) հետ 2007թ.-ին
անցկացվելիք 2 շրջանով մրցաշարում ի հայտ կբերեն աշխարհի
չեմպիոնին: