«ՈՍԿԵ ԾԻՐԱՆ» ՄԻՋԱԶԳԱՅԻՆ ԿԻՆՈՓԱՌԱՏՈՆԸ ԸՆԴԼԱՅՆՈՒՄ Է
ԳՈՐԾՈՒՆԵՈՒԹՅԱՆ ՇՐՋԱՆԱԿՆԵՐԸ
22-12-2005 17:40:00 | Հայաստան | Մշակույթ
ԵՐԵՎԱՆ, 22 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: 2006 թ. հուլիսի
11-15-ը Երեւանում կայանալիք «Ոսկե ծիրան» միջազգային երրորդ
կինոփառատոնի օրերին սկիզբ կդրվի «Ռեժիսորներ առանց սահմանի»
նորաստեղծ կազմակերպության գործունեությանը: Կազմակերպության
նպատակն է ստեղծել տարածաշրջանային կինոգործիչների ֆորում, սատարել
անկախ կինոարտադրությանը, ստեղծել տարածաշրջանային ցանց, օժանդակել
համատեղ կինոարտադրությանը:
Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում նշեց
Հայաստանի Կինոքննադատների եւ կինոլրագրողների ասոցիացիայի նախագահ
Սուսաննա Հարությունյանը, կազմակերպության ձեւավորման գործընթացը
սկսվել էր դեռեւս անցյալ տարվա «Ոսկե ծիրան» կինոփառատոնի օրերին
կազմակերպված սեմինարի ժամանակ: «Կինոն որպես միջմշակութային
երկխոսության միջոց» թեմայով սեմինարին ներկա էին 12 երկրների
50-ից ավելի կինոքննադատներ, ռեժիսորներ, արվեստաբաններ,
կինոլրագրողներ, դերասաններ եւ ազգագրագետներ, որոնց քննարկումների
եւ երկխոսության արդյունքում էլ ծնվել էր այս գաղափարը:
Ս. Հարությունյանի խոսքերով, այս տարվա դեկտեմբերի 2-4-ը
Լիսաբոնում կայացած Եվրոպական մշակութային պառլամենտի 4-րդ
նստաշրջանին ինքը ներկայացրել է «Ռեժիսորներ առանց սահմանի»
կազմակերպության ծրագիրը, որն արժանացել է պառլամենտի
պատգամավորների հավանությանը: Հաշվի առնելով ծրագրի
կարեւորությունը տարածաշրջանի համար` Եվրոպական մշակութային
պառլամենտը որոշում է կայացրել ստանձնել այդ ծրագրի
հովանավորությունը, ինչն էլ ամրագրվել է Լիսաբոնի հռչակագրում:
2006 թ. «Ոսկե ծիրան» կինոփառատոնի օրերին, հուլիսի 13-14-ը,
կկազմակերպվի նոր սեմինար, որին կմասնակցեն նորաստեղծ
կազմակերպության հաստատված անդամները: