ՀԱՅԱՍՏԱՆԻ ԱՐՏԳՈՐԾՆԱԽԱՐԱՐԸ ԹՈՒՅԼ ԱՐՁԱԳԱՆՔԵՑ ԻՐԱՆԻ ԿՈՂՄԻՑ
ՀՈԼՈՔՈՍԹԻ ՈՒՐԱՑՄԱՆԸ
21-12-2005 13:58:00 | ԱՄՆ | Վերլուծություն
Հարութ Սասունյան, «Կալիֆոռնիա կուրիեր»
Անցյալ շաբաթ արտգործնախարար Վարդան Օսկանյանը խուսափողական
պատասխան տվեց, երբ նրան հարց տվեցին Իրանի նախագահ Մահմուդ
Ահմադինեժադի կողմից հրեական Հոլոքոսթի պարբերական ուրացումների
վերաբերյալ:
Օսկանյանի պատասխանը տարածվեց տարբեր լրատվական
գործակալությունների կողմից, այդ թվում «Ազատություն»-Ազատ Եվրոպա
ռադիոկայանի ծավալուն հաղորդագրությամբ, որ վերնագրված էր.
«Երեւանը չի շտապում դատապարտել Իրանի ղեկավարին Հոլոքոսթն
ուրանալու համար»:
«Մենք միշտ ձեռնպահ ենք մնացել այդ հարցով գնահատականներից, -
ասել է Օսկանյանն անցած շաբաթ, երբ նրան խնդրել են մեկնաբանել
նախագահ Ահմադինեժադի հայտարարությունը, որ համընդհանուր
դատապարտման էր արժանացել:- Մենք Իրանի հետ մեր հարաբերությունները
դիտարկում ենք միայն երկկողմ շրջանակում: Նման հարցեր երբեք չեն
քննարկվել մեր երկկողմ հարաբերություններում»:
Միացյալ Նահանգները, Եվրամիությունը եւ նույնիսկ Ռուսաստանը`
Իրանի մերձավոր դաշնակիցը, խստիվ դատապարտել են Հոլոքոսթի
ուրացումը Իրանի ղեկավարի կողմից: Հրաժարվելով դատապարտել
Հոլոքոսթի ուրացումը Իրանի կողմից եւ մատնանշելով, որ դա Հայաստանի
եւ Իրանի միջեւ երկկողմ հարաբերությունների հարց չի հանդիսացել`
Օսկանյանը Հայաստանը խոցելի դարձրեց միջազգային հանրության
քննադատության համար:
Հայաստանի արտգործնախարարի արձագանքը զարմանալիորեն
անհամարժեք էր, հատկապես երբ նա եւ նրա օգնականները մի քանի շաբաթ
ունեին խորհելու այդ հարցի շուրջ եւ ավելի լավ պատասխան
պատրաստելու, քան տվեց նա: Օսկանյանի պատասխանի հետ կապված երեք
խնդիր կա. 1) Հոլոքոսթի ուրացումը որպես Իրանի եւ Հայաստանի միջեւ
հարաբերություններից դուրս գտնվող հարց ներկայացնելը նշանակում է
անարձագանք թողնել Հոլոքոսթի` ամբողջ մարդկությանն առնչվող
հանցագործության ուրացումը; 2) Ասելը, թե Հոլոքոսթի ուրացումն
առնչություն չունի հայ-իրանական հարաբերությունների հետ, հնարավոր
է դարձնում, որպեսզի մնացյալ ամբողջ աշխարհը նույն անտարբեր
պատասխանը տա, երբ նրան խնդրեն ընդդիմանալ Թուրքիայի կողմից Հայոց
ցեղասպանության ուրացմանը; 3) Իրանի հետ կապված Հայաստանի
քաղաքական/տնտեսական շահերից ելնելով` Հոլոքոսթի ուրացումը
չդատապարտելը կասկածի տակ է դնում Հայաստանի իսկ քննադատությունը
Իսրայելի եւ Միացյալ Նահանգների հասցեին:
Հայերը հաճախ են մեղադրում այս երկու երկրներին իրենց
աննրբանկատ եսասիրական նկատառումներով Հայոց ցեղասպանության
առնչությամբ Թուրքիայի ուրացողական դիրքորոշմանն աջակցելու մեջ:
Նախարար Օսկանյանը կարող էր այս հարցին խուսափողական պատասխան
տալ երկու պատճառներով. 1) Չցանկանալով նեղացնել Իրանի
ղեկավարությանը, ինչը կարող էր հանգեցնել Իրանի եւ Հայաստանի միջեւ
կարեւորագույն տնտեսական կապերի խզման: եւ 2) Ցանկանալով
հաղորդագրություն ուղարկել Իսրայելի ղեկավարներին` հիշեցնելով
նրանց իրենց անընդունելի աջակցությունը թուրքական կառավարության
կողմից Հայոց ցեղասպանության ուրացմանը:
Նկատի ունենալով վերը նշված հասկանալի մտահոգությունները`
գերադասելի կլիներ, եթե նախարար Օսկանյանն իր պատասխանը ձեւակերպեր
ընդհանուր գծերով հետեւյալ կերպ. «Քանի որ Հայաստանը ճանաչում է
բոլոր ցեղասպանությունները` ներառյալ Հոլոքոսթը, մենք մտահոգված
ենք այն փաստով, որ որոշ կառավարություններ ոչ միայն չեն
դատապարտում Հայոց ցեղասպանության ուրացումը, այլեւ պաշտպանում են
Թուրքիայի ուրացողական դիրքորոշումը»:
Նման պատասխանը գերադասելի կլիներ, քանի որ այն. 1)
Ցեղասպանության ուրացման բեռը կտեղափոխեր Իսրայելի վրա; 2) Կկանխեր
Իսրայելի եւ այլ պետությունների կողմից Հայաստանի քննադատությունը
Հոլոքոսթի ուրացումն անարձագանք թողնելու համար; եւ 3) Այլ
պետությունների արդարացում չէր թողնի Հայոց ցեղասպանության
ուրացման նկատմամբ անտարբեր դիրքորոշման համար:
Հատկանշական է, որ Ամերիկայի թուրքական միությունների
համագումարի (ԱԹՄՀ) նախագահ Վուրալ Չենգիզը ժամանակ չկորցրեց Իրանի
կողմից Հոլոքոսթի ուրացման առնչությամբ Օսկանյանի
մեկնաբանությունները շահարկելու համար: Չենգիզը հայտարարեց. «Այս
հայտարարություններն ի ցույց են դնում Հայաստանի Հանրապետության
ղեկավարության երկերեսանիությունը, որը սովորաբար զուգահեռ է
անցկացնում Առաջին համաշխարհային պատերազմի ընթացքում Օսմանյան
կայսրության հայերի եւ Երկրորդ համաշխարհային պատերազմի ընթացքում
Եվրոպայի հրեաների ճակատագրի միջեւ` ջանալով ամրապնդել Թուրքիայի
դեմ իր հավակնությունները»: Նա շարունակեց. «Օսկանյանի
դիրքորոշումը պարզորոշ ցույց է տալիս, թե բարոյապես որքան փչացած է
հայաստանյան ղեկավարությունը. նրանք ոչ միայն կեղծում են
պատմությունը` Օսմանյան կայսրության հայերի ճակատագիրը համեմատելով
Երկրորդ աշխարհամարտի ընթացքում հրեաների ճակատագրի հետ, այլեւ
հենց որ խաղաթղթի վրա են հայտնվում իրենց տնտեսական շահերը`
անհապաղ իջնում են իրենց բարոյական բարձունքներից»:
Անկախ նրանից, որ ԱԹՄՀ-ի հայտարարությունը հավանաբար որեւէ
ամերիկացի բարձր վարձատրվող հանրային կապերի մասնագետի ձեռքի գործն
է, Չենգիզը թերեւս չի նկատել, որ իր կամքից անկախ ճանաչում է այն
փաստը, որ Հայաստանը «բարոյական բարձունքում» է գտնվում Հայոց
ցեղասպանությունը հրեական Հոլոքոսթի հետ համեմատելիս:
Վստահաբար, Չենգիզն Օսկանյանին քննադատելու
արժանահավատությունը չունի, քանի որ Թուրքիայի կառավարությունը
հետեւողականորեն եւ ամենավրդովեցուցիչ խոսքերով ուրանում է Հայոց
ցեղասպանությունը: Այդ առումով, հրեական Հոլոքոսթի ուրացումներն
Իրանի առաջնորդի կողմից չեն տարբերվում Հայոց ցեղասպանության
ուրացումներից, որ ցփնում են Թուրքիայի ղեկավարները վերջին 90
տարիներին (!): Միակ տարբերությունն այն է, որ երբ Իրանի ղեկավարն
ուրանում է Հոլոքոսթը, ամբողջ աշխարհը վեր է թռչում` քննադատելու
նրան, մինչդեռ խուլ լռություն է տիրում, երբ թուրք ղեկավարներն են
ուրանում Հայոց ցեղասպանությունը: