ԴՈՒԲԱՅՈՒՄ ՓԱՑՎԵԼ Է ՀԱՄԱՇԽԱՐՀԱՅԻՆ ՕՐԱԿԱՐԳԻ ՀԱՐՑԵՐԻՆ ՆՎԻՐՎԱԾ
ԳԱԳԱԹՆԱԺՈՂՈՎԸ
07-11-2008 20:06:00 | Հայաստան | Տնտեսություն
ԵՐԵՎԱՆ, 7 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 7-ին Դուբայում
աշխատանքն է սկսել Համաշխարհային օրակարգին նվիրված գագաթնաժողովը,
որը կազմակերպել են Համաշխարհային տնտեսական ֆորումը եւ Դուբայի
կառավարությունը: Գագաթնաժողովին, որպես Համաշխարհային էներգետիկ
անվտանգության խորհրդի նախագահ, մասնակցում է Հայաստանի նախկին
վարչապետ, Eurasia House International-ի հիմնադիր նախագահ Արմեն
Սարգսյանը:
Ըստ Eurasia House International-ի տրամադրած
հաղորդագրության, գագաթնաժողովը, որին մասնակցում են 700-ից ավելի
առաջատար գիտնականներ, գործարարներ, կառավարական պաշտոնյաների ու
քաղաքացիական հասարակության ներկայացուցիչներ աշխարհի 60
երկրներից, կանդրադառնա համաշխարհային ընթացիկ օրակարգի առանցքային
խնդիրների` ֆինանսական ռիսկերից մինչեւ էներգետիկ անվտանգություն
եւ կլիմայի փոփոխություն` նպատակ ունենալով գտնել դրանցից
ամենահրատապների լուծման ուղիները:
Գագաթնաժողովի արդյունքները, հետագա քննարկման եւ
գործողություններ ձեռնարկելու նպատակով, կներկայացվեն հաջորդ տարի
Դավոսում` Համաշխարհային տնտեսական ֆորումի ամենամյա ժողովին: