ՀԱՅԱՍՏԱՆԻ ՖՈՒՏԲՈԼԻՍՏՆԵՐԸ ՆՈՅԵՄԲԵՐԻ 17-ԻՆ ԿՄՐՑԵՆ
ՌՈՒՄԻՆԱՑԻՆԵՐԻ ՀԵՏ
10-11-2004 18:21:00 | Հայաստան | Սպորտ
ԵՐԵՎԱՆ, 10 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 17-ին
ֆուտբոլի Հայաստանի ազգային հավաքականը կանցկացնի աշխարհի 2006թ.-ի
առաջնության ընտափուլի հերթական խաղը: Թիմը Երեւանի «Հանրապետական»
մարզադաշտում կընդունի Ռումինիայի հավաքականին:
Հայաստանի հավաքականի նոյեմբերի 13-ից սկսվող
ուսումնամարզումային հավաքին կմասնակցեն 2 դարպասապահներ, 5
պաշտպաններ, 6 կիսապաշտպաններ եւ 5 հարձակվողներ: Նրանցից 8-ը
հանդես են գալիս Հայաստանի թիմերում, մնացած 10-ը` արտասահմանյան
տարբեր ակումբներում:
Հիշեցնենք, որ այս ընտրական մրցաշարում Հայաստանի հավաքականը
անցկացրել է 4 հանդիպում եւ բոլորում էլ պարտվել: Այս անգամ եւս
հայ ֆուտբոլիստներին դժվար խաղ է սպասվում, քանի որ Ռումինիայի
հավաքականը բավականին ուժեղ մրցակից է:
Հայաստանի երիտասարդական հավաքականը նոյեմբերի 16-ին Եվրոպայի
առաջնության շրջանակներում կմրցի Ռումինիայի երիտասարդական թիմի
հետ: Հայաստանի երիտասարդ ֆուտբոլիստները իրենց անցկացրած 4
հանդիպումներից մեկը շահել են, իսկ մյուս 3-ը` տանուլ տվել: