ՀՈՒՆԻՍԻ 28-ԻՆ ԵՐԵՎԱՆՈՒՄ ԱՇԽԱՏԱՆՔԸ ԿՍԿՍԻ ԳՐՈՂՆԵՐԻ
ՀԱՄԱՀԱՅԿԱԿԱՆ ԵՐԿՐՈՐԴ ՀԱՄԱԺՈՂՈՎԸ
25-06-2004 19:04:00 | Հայաստան | Մշակույթ
ԵՐԵՎԱՆ, 25 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 28-ից հուլիսի 7-ը
Հայաստանում կանցկացվի Գրողների համահայկական երկրորդ համաժողովը,
որին կմասնակցեն Սփյուռքի գաղթօջախների շուրջ 60 գրողներ: Արդեն
Հայաստան են ժամանել սփյուռքահայ գրողներ Երուսաղեմից, ԱՄՆ-ից,
Կիպրոսից եւ Կանադայից:
Ինչպես հունիսի 25-ի ասուլիսում հայտնեց ՀԳՄ նախագահ Լեւոն
Անանյանը, համաժողովը հնարավորություն կտա Հայաստանի եւ Սփյուռքի
գրողներին գնահատել ստեղծագործական երկու գրական դաշտերում
ստեղծված արժեքները: Բացի այդ, ըստ ՀԳՄ նախագահի, «այդ համաժողովը
մի նոր խթան կհանդիսանա Սփյուռքի եւ Հայաստանի գրական կապերի
ամրապնդման գործում»:
Ամփոփելով առաջին համաժողովից անցած երկու տարիների
արդյունքները, Լ.Անանյանը հատկապես կարեւորեց Համահայկական գրական
հիմնադրամի ստեղծման փաստը: Նա հայտնեց, որ երկրորդ համաժողովում
կկազմավորվի հիմնադրամի հոգաբարձուների խորհուրդը, որը եւ կտնօրինի
անցած տարի կազմակերպված հեռուստամարաթոնի ընթացքում հանգանակված
մոտ 200 հազար ԱՄՆ դոլարը:
Գրողների համահայկական երկրորդ համաժողովի ծրագիրը բավական
հագեցած է: Գրողները կհանդիպեն Վեհափառին, կայցելեն Օշական եւ
Ծաղկաձոր: Գրողների պատվիրակությունը կմեկնի Արցախ, որտեղ
կմասնակցի Մուրացանի 150-ամյակին նվիրված հանդիսությանը:
Համաժողովի օրերին` հունիսի 28-ին, «Առնո Բաբաջանյան» մեծ
համերգասրահում կկայանա ՀԳՄ-ի 70-ամյակին նվիրված միջոցառում, իսկ
հունիսի 30-ին Կամերային թատրոնում կնշվի պոլսապայ գրող Զահրատի
80-ամյակը:
Հուլիսի 5-ին Գրողների համահայկական երկրորդ համաժողովի
մասնակիցները կայցելեն Մեծ եղեռնի զոհերի հուշահամալիր: