Հայաստանի Մայքրոսոֆթ ինովացիոն կենտրոնի(MIC) ղեկավար Եվա Հյուսյանը կներկայացնի Հայաստանը Հարավային եւ Արեւելյան Եվրոպայի Տեղեկատվական եւ Հեռահաղորդակցության Տեխնոլոգիաների Ֆորում (SEE ICT Forum) կառույցի Ինովացիոն եւ Գերազանցության Կենտրոնների գործունեությանը նվիրված հանդիպմանը: ՀՀ Էկոնոմիկայի նախարարության, Ձեռնարկությունների ինկուբատոր հիմնադրամի, ԱՄՆ միջազգային զարգացման գործակալության, Հայաստանի պետական ճարտարագիտական համալսարանի եւ Մայքրոսոֆթ ընկերության համատեղ ջանքերով ստեղծված Մայքրոսոֆթ ինովացիոն կենտրոնը առանձնանում է նմանատիպ կառույցներից ոլորտի եւ տեղական շուկայի հետ փոխկապակցմամբ, կրթական ծրագրերի մեջ ներգրավմամբ եւ կարողությունների զարգացմանն ուղղված թիրախային ծրագրերով: Կենտրոնը հանդես է գալիս իբրեւ պետական եւ մասնավոր հատվածների, ինչպես նաեւ միջազգային դոնոր կազմակերպությունների համագործակցության հաջող օրինակ: Ավելին` Հայաստանի Մայրոսոֆթ ինովացիոն կենտրոնը բավարար ներուժ ունի իր գործունեության շրջանակը տարածաշրջանում ընդլայնելու համար, ինչը կնպաստի Հայաստանի` իբրեւ ինովացիայի խթանման տարածաշրջանային կենտրոնի կերպարի ամրապնդմանը: Հայկական հաջող փորձի ուսումնասիրությունը կարեւոր է հանդիպման մասնակից այլ երկրների համար, որոնք նույնպես մտադիր են ինովացիոն գործունեությունը խթանող կենտրոններ բացել: SEE ICT Forum-ը միավորում է Հարավային եւ Արեւելյան Եվրոպայի երկրների տեղեկատվական եւ հեռահաղորդակցության ոլորտի միությունները, դոնոր կազմակերպությունները եւ հետազոտական կառույցները: 2009 թվականից` ֆորումին միանալուց ի վեր, Հայաստանը կառույցում ներկայացնում են Ինֆորմացիոն Տեխնոլոգիաների Ձեռնարկությունների Միությունը(ԻՏՁՄ) եւ Նորք տեղեկատվավերլուծական կենտրոնը: ԻՏՁՄ նաեւ համակարգել է Jobfinder, Essential Solutions, CHS Vericel Service հայկական ընկերությունների մասնակցությունը կառույցի միջոցառումներին: 2010 թվականին կառույցի մեջ ներգրավված մի շարք երկրների ներկայացուցիչներ այցելեցին ԻՏՁՄ կողմից կազմակերպվող Digitec Business Ֆորումին: Հատկանշական է, որ, գնահատելով ԻՏՁՄ մեծ փորձը ոլորտի զարգացման եւ միջոցառումների կառավարման ասպարեզում, 2010 թվականին ԻՏՁՄ ներկայացուցիչն ընտրվեց SEE ICT Forum խորհրդի անդամ` ստանձնելով տվյալ կառուցի շրջանակներում հարավային եւ արեւելյան Եվրոպայի ՏՀՏ ոլորտի զարգացման եւ միջոցառումների կառավարման գործառույթները: Նախատեսվում է, որ SEE ICT Forum կառույցի հաջորդ հանդիպումներից մեկը կկազմակերպվի Հայաստանում, գալիք Digitec Business Ֆորում միջոցառման շրջանակներում`2012 թվականի մայիս-հունիս ամիսներին:

---