ՍԵՒԱՆԱ ԼՃԻ ՄԱԿԱՐԴԱԿԸ ՏԱՐԵՍԿԶԲԻՑ 63 ՍՄ-ՈՎ ԲԱՐՁՐԱՑԵԼ Է
28-09-2007 20:00:00 | Հայաստան | Հասարակութիւն
ԵՐԵՎԱՆ, 28 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեւանայ լճի մակարդակը
տարեսկզբի համեմատ 63 սմ-ով բարձրացել է եւ ներկայ դրութեամբ
կազմում է 1898,86 մ: Ինչպէս իր պաշտօնավարման 100-րդ օրը լրանալու
կապակցութեամբ սեպտեմբերի 28-ին հրաւիրուած ասուլիսում նշեց ՀՀ
բնապահպանութեան նախարար Արամ Յարութիւնեյանը, այս տարի Սեւանայ
լճից ջրի բացթողումները սկսուել են յունիսին եւ սեպտեմբերի 26-ի
դրութեամբ կազմել 144,4 մլն խմ: Ըստ նրա, լճի մակարդակի բարձրացման
հետեւանքով ջրի տակ մնացող 95 հա ջրածածկ անտառածածկ տարածքից
մաքրուել է 72 հա-ն:
Նախարարը նշեց, որ լճում էնդեմիկ ձկնատեսակներից`
գեղարքունիից, ամառային իշխանից եւ կողակից, պոպուլացիայի
համալրման նպատակով 2007թ.-ին պետբիւջէից յատկացւող միջոցները
աւելացել են 20 մլն դրամով (մօտ 58 հազար ԱՄՆ դոլար) եւ կազմել 29
մլն 995 հազար դրամ: Տարուայ ընթացքում լիճ է բացթողնվել 20 մլն դրամ
ընդհանուր արժողութեամբ 15119 հատ 4 գրամից աւելի եւ 84 հազար հատ
մանրաձուկ:
Ա.Յարութիւնեյանը նշեց նաեւ, որ նախարարութեան Բնապահպանական
տեսչությունը ստուգումներ եւ ստուգայցեր է իրականացրել 519
տնտեսավորող սուբյեկտներում, որտեղ արձանագրուել են բնապահպանական
492 խախտումներ: Դրանց վերացման համար տրուել են 198 պարտադիր
կատարման յանձնարարականներ, կազմուել են վարչական տուգանքի 347
ակտեր` 22,2 մլրդ դրամի չափով, եւ բնութեանը հասցուած վնասի 118
արձանագրութիւններ` 49 մլն դրամի չափով: Կիրառուած պատժամիջոցներից
պետբիւջէ է մուտքագրուել 29,2 մլն դրամ: