«ՈՐՈՇ ԵՐԿՐՆԵՐ ՈՒՆԵՆ ՆԱՒԹԻ ՊԱՇԱՐՆԵՐ, ԻՍԿ ՀԱՅԱՍՏԱՆԸ`
ԲԱՐՁՐՈՐԱԿ ՋՐԻ ԶԳԱԼԻ ՊԱՇԱՐ»,- ԱՍՈՒՄ Է ՀՀ ԲՆԱՊԱՀՊԱՆՈՒԹԵԱՆ ՆԱԽԱՐԱՐԸ
23-03-2007 19:00:00 | Հայաստան | Հասարակութիւն
ԵՐԵՎԱՆ, 23 ՄԱՐՏԻ, ՆՈՅԵԱՆ ՏԱՊԱՆ: Հայաստանն ունի բաւականաչափ
ջրային ռեսուրսներ, որպէսզի հոգա ներկայ եւ կանխատեսելի կարիքները:
Միջին տարեկան վերականգնուող ստորերկրյա եւ մակերեւութային ջրային
ռեսուրսները կազմում են 9 մլրդ խմ: Բարձրորակ ստորերկրյա ջրային
ռեսուրսների շնորհիւ ապահովում է խմելու ջրի 96%-ը:
Ինչպէս Ջրի միջազգային օրուան եւ Հայաստանի Ջրային ռեսուրսների
կառավարման գործակալութեան (ՋՌԿԳ) հնգամյակին նուիրուած մարտի 23-ի
համաժողովում յայտնեց ՀՀ բնապահպանութեան նախարար Վարդան
Այվազեանը, որոշ երկրներ ունեն նաւթի պաշարներ, իսկ Հայաստանն ունի
բարձրորակ ջրի զգալի պաշար: Ըստ նրա, այս ռեսուրսի արդիւնաւէտ
օգտագործումը եւ կառավարումն այսօր խիստ արդիական է: Վ.Այվազեանի
խօսքերով, ջրային ռեսուրսների ճիշտ կառավարման նպատակով 2002թ.-ին
ստեղծուել է ՋՌԿԳ-ն, որի հիմնական ձեռքբերումներից են,
մասնաւորապէս, ոլորտի օրենսդրական հիմքի ստեղծումը, հանրապետութեան
ջրօգտագօրծման ծաւալի 90%-ից աւելի օրենսդրական դաշտ բերելը:
Նշուեց նաեւ, որ երկրագնդի ջրերի 97%-ն աղի է եւ խմելու կամ
ոռոգման համար ոչ պիտանի: Գետերի եւ լճերի օգտագործման համար
պիտանի եւ հասանելի ջրերը կազմում են 1%: Երկրագնդի հիդրոլոգիական
համակարգն ամէն տարի ցամաք է բերում 44 հազար խ/կմ ջուր, որից
Հայաստանին բաժին է ընկնում 0,01%` 46,6 խ/կմ:
Ջրի միջազգային օրուայ առթիւ եւ ջրային ռեսուրսների օգտագործման
եւ պահպանութեան բնագաւառում երկարամեայ գործունէութեան համար
ոլորտի մի շարք աշխատակիցներ պարգեւատրուեցին ՀՀ վարչապետի եւ
բնապահպանութեան նախարարի շնորհակալագրերով: