«ՈՐՈՇ ԵՐԿՐՆԵՐ ՈՒՆԵՆ ՆԱՎԹԻ ՊԱՇԱՐՆԵՐ, ԻՍԿ ՀԱՅԱՍՏԱՆԸ`
ԲԱՐՁՐՈՐԱԿ ՋՐԻ ԶԳԱԼԻ ՊԱՇԱՐ»,- ԱՍՈՒՄ Է ՀՀ ԲՆԱՊԱՀՊԱՆՈՒԹՅԱՆ ՆԱԽԱՐԱՐԸ
23-03-2007 19:00:00 | Հայաստան | Հասարակություն
ԵՐԵՎԱՆ, 23 ՄԱՐՏԻ, ՆՈՅՅԱՆ ՏԱՊԱՆ: Հայաստանն ունի բավականաչափ
ջրային ռեսուրսներ, որպեսզի հոգա ներկա եւ կանխատեսելի կարիքները:
Միջին տարեկան վերականգնվող ստորերկրյա եւ մակերեւութային ջրային
ռեսուրսները կազմում են 9 մլրդ խմ: Բարձրորակ ստորերկրյա ջրային
ռեսուրսների շնորհիվ ապահովվում է խմելու ջրի 96%-ը:
Ինչպես Ջրի միջազգային օրվան եւ Հայաստանի Ջրային ռեսուրսների
կառավարման գործակալության (ՋՌԿԳ) հնգամյակին նվիրված մարտի 23-ի
համաժողովում հայտնեց ՀՀ բնապահպանության նախարար Վարդան
Այվազյանը, որոշ երկրներ ունեն նավթի պաշարներ, իսկ Հայաստանն ունի
բարձրորակ ջրի զգալի պաշար: Ըստ նրա, այս ռեսուրսի արդյունավետ
օգտագործումը եւ կառավարումն այսօր խիստ արդիական է: Վ.Այվազյանի
խոսքերով, ջրային ռեսուրսների ճիշտ կառավարման նպատակով 2002թ.-ին
ստեղծվել է ՋՌԿԳ-ն, որի հիմնական ձեռքբերումներից են,
մասնավորապես, ոլորտի օրենսդրական հիմքի ստեղծումը, հանրապետության
ջրօգտագործման ծավալի 90%-ից ավելի օրենսդրական դաշտ բերելը:
Նշվեց նաեւ, որ երկրագնդի ջրերի 97%-ն աղի է եւ խմելու կամ
ոռոգման համար ոչ պիտանի: Գետերի եւ լճերի օգտագործման համար
պիտանի եւ հասանելի ջրերը կազմում են 1%: Երկրագնդի հիդրոլոգիական
համակարգն ամեն տարի ցամաք է բերում 44 հազար խ/կմ ջուր, որից
Հայաստանին բաժին է ընկնում 0,01%` 46,6 խ/կմ:
Ջրի միջազգային օրվա առթիվ եւ ջրային ռեսուրսների օգտագործման
եւ պահպանության բնագավառում երկարամյա գործունեության համար
ոլորտի մի շարք աշխատակիցներ պարգեւատրվեցին ՀՀ վարչապետի եւ
բնապահպանության նախարարի շնորհակալագրերով: