Սերժ Սարգսյանը մասնակցել է Ուկրաինայի նորընտիր նախագահ
Վիկտոր Յանուկովիչի երդմնակալության պաշտոնական արարողությանը
25-02-2010 20:56:00 | Ուկրաինա | Քաղաքական
ԿԻԵՎ, 25 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի նախագահ Սերժ
Սարգսյանը փետրվարի 25-ին Կիեւում մասնակցել է Ուկրաինայի նորընտիր
նախագահ Վիկտոր Յանուկովիչի երդմնակալության պաշտոնական
արարողությանը: Ըստ ՀՀ նախագահի Մամլո գրասենյակի հաղորդագրության,
Ս.Սարգսյանի գլխավորած պատվիրակության կազմում են «Բարգավաճ
Հայաստան» կուսակցության ղեկավար Գագիկ Ծառուկյանը, ՀՀ նախագահի
խորհրդական Անդրանիկ Մանուկյանը, Ուկրաինայում Հայաստանի արտակարգ
եւ լիազոր դեսպան Արմեն Խաչատրյանը:
Ուկրաինայի նորընտիր նախագահի երդմնակալության արարողության
կապակցությամբ հրավիրված Գերագույն Ռադայի հատուկ նիստի ավարտից
հետո Ս.Սարգսյանը մասնակցել է Կիեւ ժամանած օտարերկրյա
պետությունների ղեկավարների պատվին Վ.Յանուկովիչի կողմից տրված
պաշտոնական ընդունելությանը եւ պաշտոնական ճաշին, շփումներ ունեցել
օտարերկրյա իր գործընկերների եւ այլ բարձրաստիճան պաշտոնյաների
հետ:
Ս.Սարգսյանը Կիեւի իր կեցավայրում ընդունել է Ամերիկայի
Միացյալ Նահանգների փոխպետքարտուղար Ֆիլիպ Գորդոնին: Հանդիպման
ընթացքում քննարկվել են Հայաստան-Թուրքիա հարաբերությունների
կարգավորման գործընթացին վերաբերող հարցեր:
ՀՀ նախագահը մեկ անգամ եւս ներկայացրել է պաշտոնական Երեւանի
մոտեցումները գործընթացի ներկա փուլի վերաբերյալ եւ նշել, որ
Հայաստանը հավատարիմ է Թուրքիայի հետ հարաբերություններն առանց
նախապայմանների կարգավորելու սկզբունքին: Ֆ.Գորդոնը վերահաստատել է
Միացյալ Նահանգների աջակցությունն այս գործընթացին: Բարձր
գնահատելով Հայաստանի կառուցողական դիրքորոշումը
հարաբերությունների կարգավորման բոլոր փուլերում, նա ընդգծել է, որ
արձանագրությունների վավերացումը երկու երկրների խորհրդարաններում,
առանց դրանք գոյություն ունեցող այլ խնդիրների հետ փոխկապակցելու,
կարեւոր է հարաբերությունների կարգավորմանը հասնելու համար:
Ս.Սարգսյանի գլխավորած պատվիրակությունն նույն օրը ուշ
երեկոյան կվերադառնա Երեւան: