Հայաստանի ԱԺ-ն հաստատեց Վերահսկիչ պալատի 2010թ.-ի
գործունեության տարեկան ծրագիրը
17-11-2009 15:18:00 | Հայաստան | Քաղաքական
ԵՐԵՎԱՆ, 17 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 17-ին
Հայաստանի Ազգային Ժողովը հաստատեց Վերահսկիչ պալատի 2010թ.-ի
գործունեության տարեկան ծրագիրը:
Երկրորդ ընթերցմամբ եւ ամբողջությամբ ընդունվեց «ՀՀ
2010-2012թթ.-ի պետական վիճակագրական աշխատանքների եռամյա ծրագիրը
հաստատելու մասին» օրենքի նախագիծը: Ըստ այդմ, մասնավորապես,
ժողովրդագրության հատվածում նախատեսվում է 2010թ.-ի ապրիլի
14-23-ին անցկացնել փորձնական, իսկ 2011թ.-ի հոկտեմբերի 12-21-ին`
հերթական մարդահամար:
Խորհրդարանն ընդունեց նաեւ նախօրեին քննարկված օրինագծերը,
որոնցով փոփոխություններ եւ լրացումներ են նախատեսվում մի շարք
գործող օրենքներում:
Մասնավորապես, առաջին ընթերցմամբ ընդունվեց «Օրինաց երկիր»
խմբակցության ղեկավար Հեղինե Բիշարյանի եւ խմբակցության անդամ
Հովհաննես Մարգարյանի հեղինակած օրինագիծը, որով փոփոխություններ
եւ լրացումներ են նախատեսվում ՀՀ Քրեական օրենսգրքում: Ըստ այդմ,
լրագրողների կամ լրատվական գործունեություն իրականացնողների
պաշտպանվածության աստիճանը բարձրացնելու նպատակով առաջարկվում է
խստացնել լրագրողների մասնագիտական օրինական գործունեությանը
խոչընդոտելու համար օրենսդրությամբ սահմանված պատիժը: