«Ցեղասպանություն առանց մեկնաբանության» ֆիլմում օգտագործվել
են Գերմանիայի արտգործնախարարության արխիվային փաստաթղթերը
15-01-2009 17:40:00 | Հայաստան | Հասարակություն
ԵՐԵՎԱՆ, 15 ՀՈՒՆՎԱՐԻ, ՆՈՅՅԱՆ ՏԱՊԱՆ: «Էրեբունի պլազա»
բիզնես-կենտրոնում ՀՀ Սփյուռքի նախարարության աշխատակազմի համար
հունվարի 14-ին ցուցադրվել է «Ցեղասպանություն առանց
մեկնաբանության» ֆիլմը, որն ամբողջությամբ հիմնված է
փաստավավերագրական նյութերի վրա: Ֆիլմի սցենարի հեղինակն է Վարդան
Պապը, ռեժիսոր եւ պրոդյուսերը` Ալեքսանդր Սարդուրին:
Ըստ ռեժիսորի, ֆիլմի նկարահանման առիթ է հանդիսացել
Գերմանիայում հնչած այն մեղադրանքը, որը վերաբերում էր հայերի
կողմից Հայոց ցեղասպանության ոչ օբյեկտիվ ներկայացնելուն:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ Սփյուռքի
նախարարության Մամուլի եւ հասարակայնության հետ կապերի
վարչությունից, ֆիլմում օգտագործվել են Գերմանիայի արտաքին գործերի
նախարարության արխիվային փաստաթղթերը: Ֆիլմում գլխավոր դեր էր
կատարում լրագրող, ազգությամբ գերմանացի Վոլֆգանգ Գուստը, ով
բավական մեծ աշխատանք է կատարել գերմանական արխիվներում` Հայոց
ցեղասպանությանը վերաբերող նյութերի հայտնաբերման եւ
ուսումնասիրման գործում: