ՀԱՅԱՍՏԱՆԻ ՆԵՐԿԱՅԱՑՈՒՑԻՉ ՅՈՒՐԻ ՊԱՏՐԻԿԵԵՎԸ ՏԱՄՊԵՐԵՈՒՄ ՆՎԱՃԵՑ
ՀՈՒՆԱՀՌՈՄԵԱԿԱՆ ԸՄԲՇԱՄԱՐՏԻ ԵՎՐՈՊԱՅԻ ՉԵՄՊԻՈՆԻ ԿՈՉՈՒՄԸ
07-04-2008 20:35:00 | Ֆինլանդիա | Սպորտ
ՏԱՄՊԵՐԵ, 7 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 6-ին Ֆինլանդիայի
Տամպերե քաղաքում ավարտվեց հունահռոմեական ըմբշամարտի Եվրոպայի
առաջնությունը: Հայաստանի ներկայացուցիչներից Ռոման Ամոյանը (55
կգ, Երեւան) գրավեց 2-րդ տեղը եւ արժանացավ արծաթե մեդալի, իսկ
ծանր քաշային Յուրի Պատրիկեեւը (Երեւան) հաղթեց բոլոր
մրցակիցներին, գրավեց 1-ին տեղը եւ նվաճեց ոսկե մեդալ:
Յու.Պատրիկեեւը, ինչպես նաեւ Արման Ադիկյանը (66 կգ, Էջմիածին)
դեռեւս 2007թ.-ին Բաքվում անցկացված աշխարհի առաջնությունում ձեռք
էին բերել «Պեկին 2008»-ի օլիմպիական ուղեգիր: Փաստորեն Տամպերեի
աառջնությունում մրցագորգ ելած Հայաստանի ազատ եւ հունահռոմեական
ոճի մյուս 14 ներկայացուցիչները անմասն մնացին խաղարկված
օլիմպիական ուղեգրերից:
Նշենք, որ հունահռոմեականների առաջնությունում Եվրոպայի
չեմպիոն դարձավ նաեւ Ուկրաինան ներկայացրած գյումրեցի Արմեն
Վարդանյանը (66 կգ): Մեկ այլ գյումրեցի` Շվեդիան ներկայացրած
Աթենքի օլիմպիական խաղերի փոխչեմպիոն Արա Աբրահամյանը (74 կգ),
արժանացավ բրոնզե մեդալի, իսկ Բուլղարիան ներկայացրած օլիմպիական
խաղերի կրկնակի չեմպիոն մարտունեցի Արմեն Նազարյանը (60 կգ) դարձավ
արծաթե մեդալակիր: