ԵՐԵՎԱՆ, 8 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ կառավարության նոյեմբերի 8-ի նիստում հավանություն է տրվել «ՀՀ քրեական օրենսգրքում փոփոխություններ եւ լրացումներ կատարելու մասին» ՀՀ օրենքի նախագծին: Ինչպես նիստից հետո հայտնեց ՀՀ գլխավոր դատախազի տեղակալ Մնացական Սարգսյանը, օրենքի ընդունումը պայմանավորված է տնտեսական գործունեության դեմ ուղղված հանցագործությունների դեմ պայքարում իրականացվող քրեաիրավական քաղաքականության փոփոխման անհրաժեշտությամբ: Ըստ նրա, նախատեսված փոփոխություններով, տնտեսական հանցագործության դեպքում որպես վարչական պատիժ տուգանքի վերին սահմանային չափը ներկայիս նվազագույն աշխատավարձի հազարապատիկի փոխարեն նախատեսվում է դարձնել երեք հազարապատիկ, իսկ ազատազրկման ժամկետը` 2-4 տարվա փոխարեն դարձնել 3-5 տարի: Նշվեց նաեւ, որ վիճակագրական տվյալների համաձայն, անցած տարի արձանագրվել է տնտեսական հանցագործությունների 137 դեպք, ինչը 2005թ.-ի համեմատ կրկնակի ավելի է: Ի դեպ, Մ.Սարգսյանը տեղեկացրեց, որ «Պիցցա դի Ռոմա» ընկերության տնօրենի նկատմամբ օրերս քրեական գործ հարուցելու համար հիմք է հանդիսացել ընկերությանը պատկանող յոթ օբյեկտներից միայն մեկում հայտնաբերված 15 մլն դրամի (մոտ 45 հազար ԱՄՆ դոլար) չափով հարկերից խուսափելը:

---