ՏԱՐԵՍԿՉԲԻՑ ՀԱՅԱՍՏԱՆԻ ՍՈՑԾԱՌԱՅՈՒԹՅԱՆ ՏԱՐԱԾՔԱՅԻՆ
ԳՈՐԾԱԿԱԼՈՒԹՅՈՒՆՆԵՐՈՒՄ ԱՐՁԱՆԱԳՐՎԵԼ ԵՆ ՄՈՏ 6,4 ՄԼՆ ԴՐԱՄԻ
ԽԱԽՏՈՒՄՆԵՐ
29-10-2007 17:30:00 | Հայաստան | Հասարակություն
ԵՐԵՎԱՆ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Սոցիալական
ծառայության 16 տարածքային գործակալություններում իրականացված
ստուգումների արդյունքում հայտնաբերվել են 6,4 մլն դրամի (մոտ 19,6
հազար ԱՄՆ դոլար) խախտումներ պարունակող գործեր: Այս մասին «ՆՈՅՅԱՆ
ՏԱՊԱՆ»-ի թղթակցին հայտնեց ՀՀ Աշխատանքի եւ սոցիալական հարցերի
նախարարության Վերահսկողության եւ սոցիալական մոնիտորինգի
վարչության պետ Վահան Բաղդասարյանը: Ըստ նրա, արձանագրված
խախտումների գերակշիռ մասը պայմանավորված է տեղական
ինքնակառավարման մարմինների կողմից ներկայացված կեղծ
տեղեկանքներով:
Վ.Բաղդասարյանը նշեց, որ այս տարվա ընթացքում
ուսումնասիրություններ են անցկացվել նաեւ Հայաստանի «Զբաղվածության
պետական ծառայություն» գործակալության 6 տարածքային կենտրոններում,
ուր հայտնաբերվել են 173 հազար դրամի խախտումներ: Ըստ նրա,
հիմնական խախտումները պայմանավորված են, մասնավորապես,
գործազրկության նպաստի տեւողության որոշման համար աշխատանքային
ստաժի սխալ հաշվարկով:
Ըստ վարչության պետի, ստուգումներ են անցկացվել նաեւ ՀՀ
Սոցիալական ապահովագրության պետական հիմնադրամի 12 տարածքային
կենտրոններում, ուր արձանագրվել են 630 հազար դրամ ընդհանուր
գումարի ավելի եւ թերի վճարման դեպքեր: