ԿԱՌԱՎԱՐՈՒԹՅՈՒՆԸ ՀԱՎԱՆՈՒԹՅՈՒՆ Է ՏՎԵԼ «ՀՀ 2006.-Ի ՊԵՏԲՅՈՒՋԵԻ
ԿԱՏԱՐՄԱՆ ՏԱՐԵԿԱՆ ՀԱՇՎԵՏՎՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ» ՕՐԵՆՔԻ
ՆԱԽԱԳԾԻՆ
19-04-2007 20:30:00 | Հայաստան | Տնտեսություն
ԵՐԵՎԱՆ, 19 ԱՊՐԻԼԻ, ՆՈՅՅԱՆ ՏԱՊԱՆ: ՀՀ կառավարությունը ապրիլի
19-ի նիստում հավանություն է տվել «ՀՀ 2006թ. պետական բյուջեի
կատարման տարեկան հաշվետվությունը հաստատելու մասին» ՀՀ օրենքի
նախագծին, որը սահմանված կարգով կներկայացվի ՀՀ ԱԺ: Նախագծով
առաջարկվում է ՀՀ 2006թ. պետական բյուջեի կատարման տարեկան
հաշվետվությունը հաստատել եկամուտների գծով 441 մրդ 483 մլն 135,6
հազար դրամ, ծախսերի մասով` 481 մլրդ 183 մլն 188,4 հազար դրամ,
բյուջեի դեֆիցիտը` 39 մլրդ 700 մլն 52,8 հազար դրամ:
Ինչպես նիստից հետո հայտնեց ՀՀ ֆինանսների եւ էկոնոմիկայի
փոխնախարար, գլխավոր գանձապետ Ատոմ Ջանջուղազյանը, 2006թ.-ի համար
պլանավորված 412 մլրդ 356 մլն դրամի (ըստ այդ տարվա միջին
փոխարժեքի` մոտ 991 մլն ԱՄՆ դոլար) եկամուտների փոխարեն, հաշվի
առնելով տարվա ընթացքում տնտեսական զարգացումները, եկամուտների
ծավալը վերանայվել է եւ սահմանվել 451,461 մլրդ դրամ, որի դիմաց
արձանագրվել է 97,8%-ի կատարողական: Ըստ նրա, եկամուտների
թերստացման հիմնական պատճառը արտաքին աղբյուրներից նախատեսված 39,5
մլրդ դրամի փոխարեն ընդամենը 15,2 մլրդ դրամի (կամ նախատեսվածի
38,4%-ը) ստացումն է: Նույն պատճառով ցածր է եղել նաեւ ծախսերի
կատարողականը, որը կազմել է 523 մլրդ դրամ, կամ 92%:
Ա.Ջանջուղազյանը նշեց, որ սեփական աղբյուրների հաշվին
կատարվող ծախսերի կատարողականը կազմել է 98%, իսկ արտաքին
աղբյուրներինը` 46%: 2006թ.-ին դեֆիցիտի ֆինանսավորման ծրագրով
նախատեսված 71,6 մլրդ դրամի դիմաց արձանագրվել է 55,5%
կատարողական: