Վէյք Ան Զէիի «Թաթա Սթիլ» գերմրցաշարքի 10րդ հանգրուանին, Հայաստանցի ուժեղագոյն ճատրակիստ Լեւոն Արոնեան սեւ խաղաքարերով կրցաւ պարտութեան մատնել Անիշ Կիրիի հետ եւ 7.5 նիշով միանձնեայ գլխաւորեց աղիւսակը։ Արոնեան մէկ նիշ առաւելութիւն ունի իր հետապնդողներու նկատմամբ։ 10րդ փուլին յաղթանակներ տարին նաեւ Կաթա Քամսքի, Վասիլի Իվանչուկ եւ Ֆապիանօ Կարվանա, որոնք առաւելութեան հասան համապատասխանաբար Սէրկէյ Քարիաքինի, Տավիտ Նավարայի եւ Վէսէլին Թօփալովի դէմ։ Մրցաշարային աղիւսակի մէջ երկրորդ դիրքի վրայ է Վասիլի Իվանչուկ 6.5 նիշով, Քառլսէն եւ Ռաճապով 6ական նիշով 3-4րդ տեղերը կը գրաւեն։ Այսօր արձակուրդի օր է, իսկ վաղը Արոնեան պիտի մրցի Տավիտ Նավարայի հետ։ Միւս կողմէ, Հայաստանի Դատական Նախարար Հրայր Թովմասեան երէկ ասուլիսի մը ընթացքին յայտնեց թէ Լեւոն Արոնեան հայ բանտարկեալներուն դասընթացքներ պիտի սարքէ։ Նախարարը նշեց թէ այսպիսի համաձայնութիւն գոյացած է Հայաստանի երկու ուժեղագոյն ճատրակիստներու հետ, որոնցմէ մէկը Լեւոն Արոնեանն է։ »Երբ Արոնեան Հայաստան գտնուի, ան բանտերու մէջ միաժամանակեայ խաղի դասեր պիտի տայ։ Այդպէս մենք կը յուսանք լեցնել բանտարկեալներու ազատ ժամանակը։ Բացի ատկէ մտադիր ենք նաեւ ֆութպոլային մրցապայքար կազմակերպել», ըսաւ Նախարարը։ «Մ»

---