Քաթարի դեսպանը Հայաստանի արտգործնախարար Էդվարդ Նալբանդյանին
է հանձնել իր հավատարմագրերի պատճենը
10-06-2010 19:42:00 | Հայաստան | Քաղաքական
ԵՐԵՎԱՆ, 10 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ արտգործնախարար Էդվարդ
Նալբանդյանը հունիսի 10-ին ընդունել է Հայաստանում Քաթարի
Պետության նորանշանակ դեսպան Իբրահիմ Աբդ ալ Ռահման ալ-Մեղաիսիբիին
(նստավայրը` Թեհրան) հավատարմագրերի պատճենի հանձնման
կապակցությամբ:
Շնորհավորելով դեսպանին նշանակման կապակցությամբ,
Է.Նալբանդյանը հույս է հայտնել, որ նա ջանքեր կգործադրի երկկողմ
հարաբերությունների առավել զարգացման համար: Հայաստանի
արտգործնախարարը նշել է, որ արաբական աշխարհի հետ
հարաբերությունների հետագա ամրապնդումն ու ընդլայնումը Հայաստանի
արտաքին քաղաքականության առաջնայնություններից է, եւ հենց այդ
պատճառով որոշում է կայացվել արաբական երկրներում Հայաստանի նոր
դիվանագիտական ներկայացուցչություններ հիմնելու վերաբերյալ:
Դեսպան ալ Ռահման ալ-Մեղաիսիբիին, շնորհակալություն հայտնելով
բարեմաղթանքների համար, ընդգծել է, որ Քաթարում առանձնահատուկ
համակրանքով են վերաբերվում Հայաստանին եւ հայ ժողովրդին, եւ իր
առաքելության ընթացքում ինքը կանի առավելագույնը համագործակցության
զարգացման համար:
Զրուցակիցները քննարկել են քաղաքական երկխոսության
ակտիվացման, իրավապայմանագրային դաշտի ընդլայնման,
առեւտրատնտեսական համագործակցության եւ մշակութային փոխանակումների
ակտիվացման նպատակով ձեռնարկվելիք քայլերը:
Ըստ ՀՀ ԱԳՆ Մամուլի եւ տեղեկատվության վարչության
հաղորդագրության, զրույցի ընթացքում Է.Նալբանդյանն ու Իբրահիմ Աբդ
ալ Ռահման ալ-Մեղաիսիբին անդրադարձել են միջազգային
կազմակերպությունների շրջանակներում համագործակցությանը, մտքեր
փոխանակել մերձավորարեւելյան խնդիրների եւ դրանց լուծման ուղիների
շուրջ:
Տեղեկանք. Իբրահիմ Աբդ ալ Ռահման ալ-Մեղաիսիբին ծնվել է
1959թ.-ին Քաթարում: Ուսանել է ԱՄՆ-ում` ստանալով քաղաքագիտության
բակալավրի աստիճան: 1998-2002թթ.-ին եղել է Ջեդդայում (Սաուդյան
Արաբիա) Կատարի գլխավոր հյուպատոս, 2003-2005թթ.-ին` Ֆիլիպիններում
Կատարի դեսպան: 2008-2009թթ.-ին եղել է Կատարի ԱԳՆ Եվրոպական եւ
ամերիկյան երկրների վարչության պետի տեղակալի ժամանակավոր
պաշտոնակատար, իսկ 2009թ.-ի դեկտեմբերից Իրանի Իսլամական
Հանրապետությունում Կատարի Պետության դեսպանն է: