Որպէս իրանահպատակ եւ իրանաբնակ քաղաքացիներ, իրանահայերը եւս գործող նախագահի սոցիալ-տնտեսական կուրսից դժգոհելու-անհանգստանալու հիմնաւոր պատճառներ ունեն, ինչպէս որ դրանք առգոյ են, ասենք, հասարակական լայն շերտերում, ինչու ոչ նաեւ՝ երկրի քաղաքական եւ մասնաւորապէս օրէնսդիր (խորհրդարան) շրջանակներում: Բոլորին են յայտնի նախորդ եւ նորընտիր խորհրդարանի տեղ-տեղ սուր հակադրութիւնների ու քննադատութիւնների ու մինչեւ իսկ գործադիրի ղեկավարին (նախագահ) մեջլիսի դռնբաց նիստերում հարցապնդման ենթարկելու փաստերը... Սա ընդհանրապէս, իսկ որպէս համայնք ու քաղաքացիներ, իրանահայերս պրն. Ահմադինեժադին դժգոհել-բողոքելու առիթ ենք ունեցել մի այլ, մասնակի հարթութեան վրայ ու սրանից շուրջ երեք տարի առաջ, երբ Կասպեանի Թեհրան-Երեւան չւերթի ողբերգական ու հոգեկան ծանրագոյն պայմանների առկայութեամբ, նախագահը բաւականին ուշացած ու ոչնչով չսփոփող ցաւակցութիւն յայտնեց աղէտեալների ընտանիքներին... Դարձեալ որպէս համայնք ու յատկապէս «կրօնական փոքրամասնութիւն»՝ դժգոհելու, քննադատելու եւ խոր ցասում ապրելու երկրորդ առիթ ու պատճառ է «ընծայւել» մեզ, ահաւասիկ, նախագահի հանգամանքը զբաղեցնող պրն. Ահմադինեժադի կողմից, երբ արդէն, թէկուզ հէնց որպէս «կրօնական փոքրամասնութիւն», հարցականի, վարկաբեկման եւ ինչքան էլ անցանկալի է արտաբերել՝ ծանակի առարկայ են դառնում հինաւուրց ու բարեպաշտ համայնքիս ժողովրդի կրօնական հաւատալիքներն ու զգացմունքները, երբ պրն. Ահմադինեժադը կրօնական փիլիսոփայութիւնների մասին որոշեց աղաղակող մեկնութիւններ անել աշխարհով մէկ՝ «Կանայք եւ Իսլ. զարթօնք» միջազգային համաժողովի ընթացքում (տեսնել թերթիս յուլիսի 14-ի «Դիտանկիւն» եւ երէկւայ Ա էջի Թեմական խորհրդի յայտարարութեան մասին լրատւութիւնները): Ու թէեւ անմիջապէս՝ յաջորդ օրն իսկ նախորդ խորհրդարանի մի պատգամաւոր (ի դէպ, հոգեւորական) մեծ սայթաքում ու անպատեհ բնութագրեց Ահմադինեժադի յայտարարութիւնները, բայց ցաւօք ու յատկապէս ի զարմանս մեզ՝ մէկ այլ հաւաքի ընթացքում (երեւի նոյն հոգեւորականին հակադարձելու համար) նախագահն կրկնեց ու պնդեց իր տեսակէտները՝ դրանց նոյնիսկ ծաղրական երանգ հաղորդելով.... («Արդեօք Աստւած քրիստոնէութեան ու մովսիսականութեան անւամբ կրօ՞ն է առաքել թէ դրանք այդ անւամբ բացւած «դուքաններ» են»..., կամ մի այլ տեղ յայտարարում է. «Բոլոր մարգարէներն էլ մուսուլման են եղել, իսկ տարբեր մարգարէների առկայութիւնը դեռ չի նշանակում, որ եղել են նաեւ տարբեր կրօններ...»,- մէջբերումները՝ կառավարամէտ «Իրան» օրաթերթից): Չգիտենք, արդեօք, սա արդի՞ւնք է նախագահի խորհրդատուների մտապատկերի թէ՝ ոչ, բայց որ մի բան քաջ գիտենք՝ դա այն է, որ Իսլ. յեղափոխութեան 33 տարիների ընթացքում նախադէպը չունեցող երեւոյթի ենք հանդիպում, որը մեղմ ասած՝ անհանգստացրել է ոչ միայն մեր համայնքին, այլեւ, համոզւած ենք, մտահոգւելու տեղիք պէտք է տայ երկրի ու համակարգի կրօնական, ազգային ու պետական համընդհանուր շահերով նախանձախնդիր եւ մասնաւորապէս ժողովուրդների միջկրօնական համակեցութիւնն ու համերաշխութիւնը կարեւորող բոլոր պատասխանատուներին, որոնք էլ անտարակոյս՝ գիտակ են նման դէպքերում թէ՛ ներքին, ու թէ՛ մասնաւորապէս արտաքին քաղաքա-քարոզչական չարաշահումներին: «Ալիք» օրաթերթ

---