ԵՊՀ-ում կմեկնարկի «Հնագիտությունը և միջառարկայական մոտեցումները» խորագրով հնագիտական անվճար դասընթաց
18-05-2013 14:34:24 | Հայաստան | Գիտություն եւ տեխնոլոգիաներ
Իտալիայի և Հայաստանի Հանրապետությունների միջև իրականացվող «Օժանդակություն տեղական հաստատություններին մշակութային արժեքների վերականգնման և պահպանման ոլորտում» կրթամշակութային ծրագրի շրջանակում սույն թվականի մայիսի 20-ին Երևանի պետական համալսարանում կմեկնարկի «Հնագիտությունը և միջառարկայական մոտեցումները» խորագրով հնագիտական անվճար դասընթաց:
Այն կներառի տեսական (դասախոսություններ, սեմինարներ) և գործնական մասեր (դաշտային աշխատանքներ): Դասընթացի նպատակը հնագիտական ուսումնասիրությանը վերաբերող բոլոր փուլերի (պեղումներ, փաստագրում, չափագրում, ինչպես նաև հնագիտական վերականգնմանն ուղղված խնդիրներ) արժևորումն է:
Տեսական մասը կանցկացվի ԵՊՀ Պատմության ֆակուլտետում: Դասախոսությունների շարքով հանդես կգան հայ և իտալացի դասախոսներ: Արուճի հնավայրում կանցկացվի դասընթացի գործնական մասը. Իտալիայից ժամանած հնագետները հայ ուսանողներին կներկայացնեն հնագիտական պեղման մեթոդները և իտալական մոտեցումներն այս հարցում:
Ուսանողներին դասընթացի ավարտին կտրվի վկայական:
Հիշեցնենք, որ նշված ծրագրի շրջանակում հնագիտությանը նվիրված առաջին դասընթացն անց է կացվել 2012 թվականի հունիս-նոյեմբեր ամիսներին: Այն կազմակերպվել էր Իտալիայի արտաքին գործերի, ՀՀ մշակույթի նախարարությունների, Միլանի պոլիտեխնիկական համալսարանի աջակցությամբ և ՀՀ ԳԱԱ հնագիտության և ազգագրության ինստիտուտի, Երևանի, Միլանի և Ֆլորենցիայի պետական համալսարանների գործընկերությամբ:
ՀԱՅԵՐԵՆ
Русский
English
Դաս. հայերեն
French
