Նորարար միջոցներ՝ մաքուր էներգիան Ասիայի և Խաղաղօվկիանոսյան երկրների բնակչությանը հասանելի դարձնելու համար
18-06-2014 12:20:54 | Ֆիլիպիններ | Գիտություն եւ տեխնոլոգիաներ
2014թ. հունիսի 18-ին Մանիլայում, Ֆիլիպիններ, մեկնարկեց Մաքուր էներգիան Ասիայում 9-րդ ֆորումի մաս կազմող «Կայուն էներգիա բոլորի համար» խորագրով Խաղաղօվկիանոսյան տարածաշրջանի գլխավոր հանդիպումը, որի նպատակն է համախմբել ներդրումներն ու նորարար միջոցները՝ մաքուր էներգիան Ասիայի և Խաղաղօվկիանոսյան երկրների բնակչության համար հասանելի դարձնելու համար:
«Էներգետիկ ռեսուրսների ապահովվածության տեսանկյունից աշխարհի ամենից անապահով բնակչությունն ապրում է հիմնականում Ասիայի զարգացող երկրներում: Այստեղ ավելի քան 600 միլիոն մարդ զրկված է էլեկտրաէներգիայից, շուրջ 1,8 միլիարդ մարդ սնունդ պատրաստելու և կացարանը ջեռուցելու համար որպես վառելիք մինչ օրս օգտագործում է վառելափայտ կամ փայտածուխ», - ասում է Գիտելիքների կառավարման և կայուն զարգացման գծով ԱԶԲ-ի փոխնախագահ Բինդու Լոհանին:
«Սակայն մենք կարող ենք հաղթահարել էներգետիկ աղքատությունը՝ էներգիայի կայուն և ցածր ածխածնային էներգետիկ միջոցներով: Այդ նպատակին հասնելու համար նախաձեռնության շուրջ համախմբում ենք ներդրողների, նորարարների ու փորձագետների», - հավելում է պարոն Լոհանին:
Նախաձեռնության շրջանակներում համագործակցում են Ասիական զարգացման բանկը (ԱԶԲ), որը վարում և հյուրընկալում է ֆորումը, ՄԱԿ-ի Ասիայի և Խաղաղօվկիանոսյան երկրների տնտեսական և սոցիալական հանձնաժողովը (UNESCAP), ինչպես նաև ՄԱԿ-ի զարգացման ծրագիրը (UNDP):
Սա «Կայուն էներգիա բոլորի համար» նախաձեռնության ներքո կազմակերպվող երեք միջոցառումներից մեկն է, որն անցկացվում է 2011թ-ից սկսած՝ ՄԱԿ-ի գլխավոր քարտուղար Բան Կի Մունի կողմից: Այն հետապնդում է երեք հիմնական նպատակ, որոնց պետք է հասնել մինչև 2030թ:
ա)երաշխավորել ժամանակակից էներգետիկ ծառայությունների համատարած հասանելիությունը,
բ)կրկնապատկել էներգաարդյունավետության զարգացման տարեկան տեմպերը ողջ աշխարհում,
գ)կրկնապատկել վերականգվող էներգիայի կիրառման մասնաբաժինը` էներգիայի բոլոր տեսակի աղբյուների ամբողջության մեջ:
Այս համատեղ նախաձեռնության համար կօգտագործվեն ԱԶԲ-ի, ՄԱԿ-ի, ինչպես նաև Ասիայի և Խաղաղօվկիանոսյան երկրների տնտեսական և սոցիակական հանձնաժողովի էներգետիկ ծրագրերի առկա կառույցները՝ տարածաշրջանի երկրներին աջակցելու մաքուր էներգիայի ոլորտի զարգացման համար արագ գնահատում իրականացնել, քաղաքականության մշակման արդյունավետ երկխոսություն ծավալել, ինչպես նաև համախմբել երկկողմանի և գլոբալ ֆոնդերի միջոցները և խթանել ներդրումները:
Էներգիայի պահանջարկը Ասիայում կտրուկ աճում է, քանի որ արագ ընդլայնվում են նաև տարածաշրջանի տնտեսությունները, իսկ բնակչության մեծամասնությունը դառնում է քաղաքաբնակ, ինչը ևս մեծացնում է էներգիայի սպառման ընդհանուր ծավալը: 2035թ-ի դրությամբ Ասիայի զարգացող երկրներում էներգիայի սպառման ծավալը կկազմի համաշխարհային բնական էներգետիկ պաշարների սպառման ծավալի 56%-ը՝ աճելով 2010թ-ի 34%-ի համեմատ: Շրջակա միջավայրը պահպանելու համար հարկավոր կլինի մեծացող պահանջարկը բավարարել վերականգնվող էներգառեսուրսների և էներգախնայողության լայն կիրառման միջոցով:
Միջազգային էներգետիկ գործակալության գնահատմամբ՝ մինչև 2030թ. Ասիայում ու Խաղաղօվկիանոսյան տարածաշրջանում էներգիայի համապարփակ հասանելիության համար անհրաժեշտ կլինի ավելի քան 200 միլիարդ դոլլարի ներդրում կատարել:
Ասիայի 9-րդ էներգետիկ ֆորումը տեղի է ունենում Մանիլայում գտնվող ԱԶԲ-ի գլխամասային գրասենյակում՝ ս.թ. հունիսի 16-ից 20-ը: Կայուն էներգիայի զարգացումը տարածաշրջանում քննարկելու համար նախատեսվում է ներգրավել մոտ 1000 մասնակցի, որոնց թվում քաղաքականություն իրականացնող և նախագծեր մշակող մասնագետների, ներդրողների և տեխնիկական փորձագետների: Քննարկումներն անցկացվում են բարձր մակարդակով՝ Բութանի, Ճապոնիայի, Մալդիվների, Ֆիլիպինների, և Տաջիկստանի էներգետիկայի նախարարների մասնակցությամբ, և անդրադառնում են երեք հիմնախնդրի՝ էներգառեսուրսների մատչելիությանը, կայունությանը և էներգետիկ անվտանգությանը:
Ֆորումին նախորդած հանդիպումների ժամանակ ԱԶԲ-ն փոխըմբռման հուշագիր ստորագրեց Աբու Դաբիում տեղակայված Վերականգնվող էներգիայի միջազգային գործակալության հետ՝ պայմանավորվելով մաքուր և վերականգվող էներգիայի հիմնախնդրի լուծման մասին գիտելիքներ փոխանակել:
Էներգիա հասանելիությունը, վերականգվող էներգիայի զարգացումն ու էներգաարդյունավետությունը ԱԶԲ-ի առաջնահերթություններից են: 2013թ-ին ԱԶԲ-ն 2.3 միլիարդ դոլլար է ներդրել մաքուր էներգիայի ոլորտում և նպատակադրվել է շարունակել տարեկան առնվազն 2 միլիարդ դոլլարի ներդրում կատարել այս ոլորտում:
ԱԶԲ-ն, որի կենտրոնակայանը գտնվում է Մանիլայում, նպատակ ունի նվազեցնել աղքատությունը Ասիայում և Խաղաղօվկիանոսյան տարածաշրջանում՝ ներառական տնտեսական աճի, բնապահպանակայուն զարգացման, ինչպես նաև տարածաշրջանի ինտեգրման միջոցով: ԱԶԲ-ն հիմնադրվել է 1966 թվականին և ունի 67 անդամ երկիր, որոնցից 48-ը տարածաշրջանից են: 2013թ-ին ԱԶԲ-ի ընդհանուր աջակցությունը կազմել է 21.0 միլիարդ ԱՄՆ դոլլար՝ ներառյալ 6,6 միլիարդ ԱՄՆ դոլլարի չափով համաֆինանսավորումը:
ՀԱՅԵՐԵՆ
Русский
English
Դաս. հայերեն
French
