Եթե Հայաստանում ներկայիս ներկրողների թիվը չավելանա, ապա «Քարֆուրի» մուտքով Հայաստան ոչինչ չի փոխվի. Արամ Սարգսյան

12-03-2015 20:12:44 | Հայաստան | Տնտեսություն

«Ներկայիս իշխանությունները դարձյալ խրախուսում են մենաշնորը և պաշտպանում այն», -մարտի 12-ին լրագրողների հետ հանդիպման ժամանակ նշեց Հայաստանի Դեմոկրատական կուսակցության հիմնադիր և առաջին քարտուղար Արամ Սարգսյանը, նշելով, որ սա ոչ միայն Երեւանում բացված «Քարֆուր» հիպերմարկետի հարցում է, «այլ ընդհանրապես այդպես է»:

Ըստ նրա` «Քարֆուրի» դերը Հայաստանում ավելի կարևոր կլիներ և ոլորտում մրցակցություն կառաջանար, եթե հիպերմարկետում վաճառվող տեղական և ներմուծվող ապրանքների քանակի հարաբերակցությունը լիներ ոչ թե 95-5 տոկոս, այլ թուլյատրվեր ընկերությանը ներմուծել ապրանքների 45 տոկոսը:

Ա. Սարգսյանի կարծիքով` 95 տոկոս հայրենական արտադրության մեջ մտնում է նաև Եվրասիական տնտեսական միության շուկայից ներմուծվող ապրանքները, հետևաբար եթե ներկայիս հայտնի ներկրողների թիվը չավելանա, ապա մրցակցության դաշտը նեղ կմնա, իսկ գնային քաղաքականությունն էլ չի փոխվի:

«Տեղի իշխանությունների կողմից վերջերս մեծ աղմուկով հայտարարված օլիգոպոլիայի դեմ պայքարը սահմանափակվեց մեկ մարդու ճնշմամբ, քանի որ եթե այս պայքարը զարգանար, ապա այս ոլորտում ևս պետք է կիրառվեր նույն մոտեցումը»,- նշեց Ա. Սարգսյանը` հավելելով, որ ներմուծվող ապրանքների համար սահմանված 5 տոկոսը երկարատև բանակցությունների արդյունք է ներկրողների և կազմակերպության ղեկավարների միջև:

Գնահատելով աշխարհի խոշորագույն առևտրային ցանցերից մեկի` «Քարֆուրի» մուտքը Հայաստան` սոցիոլոգ Ահարոն Ադիբեկյանը նշեց, որ նորաբաց հիպերմարկետի առաջին դրական ազդեցությունը կլինի այն, որ Երևանում կձևավորվի առևտրային նոր մշակույթ, և մյուս սուպերմարկետները «Քարֆուրից» կսովորեն ապահովել գրագետ սպասարկման ձևաչափ:

««Քարֆուրի» մուտքը Հայաստան կարելի է դիտարկել որպես գովազդ այդ ընկերության համար, քանի որ այստեղ բացված մեկ հիպերմարկետը չի բերի բավարար եկամուտ առևտրային այդ խոշոր ցանցի համար»,- ասաց Ա. Ադիբեկյանը:

Վերջինիս կարծիքով «Քարֆուրը» Երևանում կառաջնորդվի «Շատ վաճառքի միավոր քիչ եկամուտով» սկզբունքով:

Էլիզա Զախարյան, «Նոյյան Տապան»

Նոյյան տապան - Տնտեսություն

Կարդացել են 619 անգամ

Եթե Հայաստանում ներկայիս ներկրողների թիվը չավելանա, ապա «Քարֆուրի» մուտքով Հայաստան ոչինչ չի փոխվի. Արամ Սարգսյան

Noyan Tapan TV