Արցախյան ազատամարտի նոր մանրամասներ՝ Լարիսա Գեւորգյանի վավերագրքում

15-05-2015 23:39:35 | Հայաստան | Նոր գրքեր

Լույս է տեսել արձակագիր Լարիսա Գևորգայնի «Հավերժում ապրող հորս` Արցախից» վավերագիրքը, որը նվիրված է Արցախի ազատամարտում նահատակված հայորդիների հիշատակին եւ պատմում է արցախյան ազատամարտում իրենց մասնակցությունն ունեցած հերոսներից շատերի մասին:

«Այս գիրքը շատ հետաքրքիր կերպարաշար ունի, եւ հերոսների մեծ մասն այժմ ապրում են մեր կողքին», - մայիսի 15-ին, Հայաստանի Գրողների միությունում կայացած շնորհանդեսին ասաց գրքի հեղինակը: Ըստ նրա` գրքի հերոսների թվում են Կոմանդոսը, արցախյան ազատամարտում զոհված Վարդան Ստեփանյանը (Դուշման Վարդանը), Փարիզում կատարված «Վան» գործողության խմբապետ, հայկական պահանջատիրությամբ մշտապես հանդես եկող Վազգեն Սիսլյանը, զինագործ Սամվել Խաչիկյանը, Ջորջ և Քերոլան Նաջարյանները և այլոք:

Միջոցառմանը ներկա էին ինչպես գրքի կենդանի հերոսները, այնպես էլ զոհվածներից ոմանց հարազատները: Դուշման Վարդանի մայրը` տիկին Զարուհին, շնորհավորելով Լ. Գևորգյանին, ընդգծեց, որ վերհոնշյալ վավերագիրքը այն քիչ գրքերից է, որում իրապես ներկայացված է արցախյան ազատամարտի ճշմարտությունը. «Սա պատմական և գեղարվեստական մեծ արժեք ունեցող գիրք է, որտեղ կա նաև որդուս մասին պատմող բաժին»,- ասաց նա:

«Հավերժում ապրող հորս` Արցախից» վավերագրքի հերոսներից մեկը՝ Վազգեն Սիսլյանը, նշեց, որ շարունակում է հավատարիմ մնալ իր պահանջատիրության գաղափարին և ուրախ կլինի, եթե գրքի շնորհանդեսին ներկա գտնվող գրողներն ու արձակագիրներն ավելի հաճախ գրեն Արևմտյան Հայաստանի ազատագրության մասին:

Վավերագրքի գրական արժեքին անդրադառնալիս` Լեզվի պետական տեսչության նախկին պետ Լավրենտի Միրզոյանը նշեց, որ Լ. Գևորգյանը կարողացել է գտնել սեփական ասելիքն ներկայացնելու յուրօրինակ ձև, որը նաև պաըկերավոր է: Որպես լեզվաբան` Լ. Միրզոյանը կարևորեց հեղինակի կողմից առօրյայում չօգտագործվող հայերեն որոշ բառերի ճիշտ և տեղին օգտագործումը վավերագրքում: Ըստ նրա` այն ընթերցելուց հետո սկսել է ավելի բարձր գնահատել գրքի հերոսներին:

Ինը ենթագլուխներից բաղկացած «Հավերժում ապրող հորս` Արցախից» վավերագրքում ընդգրկված պատումները ներկայացված են գրքի հեղինակի և իր հոր` Հայրենական մեծ պատերազմի մասնակից Զավեն Գևորգյանի, միջև ունեցած զրույցի տեսքով: