Վերջին շաբաթներուն ընթացքին ամբողջ աշխարհի տարածքին հրապարակուեցան հազարաւոր յօդուածներ, որոնք կը մերկացնեին Թուրքիոյ ռազմավարական խաբէութիւնը՝ օգտագործելով «Իսլամական պետութեան» դէմ պայքարի պատրուակը՝ ձեռնարկելու համար ցեղասպանական ռմբակոծութեան արշաւի ընդդէմ քիւրտերու, որոնք Սուրիոյ եւ Իրաքի մէջ խիզախօրէն կը դիմակայեն «Իսլամական պետութիւն»ը:

 

«Ուոլ Սթրիթ Ճըրնըլ» (Wall Street Journal) թերթը 12 Օգոստոսին տեղեկացուց, որ ամերիկացի բարձրաստիճան զինուորական մը մեղադրած է Թուրքիան՝ ամերիկեան կառավարութիւնը խաբելու յանցանքով, արտօնելով Ինճիրլիքի ռազմակայանի օգտագործումը «Իսլամական պետութեան» վրայ յարձակելու համար, իբրեւ ծածկ նախագահ Էրտողանի կողմէ պատերազմ հռչակելուն քիւրտ զինեալներու (ՔԱԿ) դէմ, Հիւսիսային Իրաքի մէջ: Մինչեւ օրս Թուրքիան կատարած է 300 օդային յարձակում ՔԱԿի եւ միայն երեք՝ «Իսլամական պետութեան» դէմ։

 

Էրտողանի նպատակն է քիւրտերը պատժելու միջոցով շահիլ թուրք ընտրողներու համակրանքը յաջորդ խորհրդարանական ընտրութիւններուն, որոնք կարելիութիւն պիտի տան իր կուսակցութեան բացարձակ մեծամասնութիւն ստանալու եւ հաստատելու մենատէր նախագահական կրօնապետութիւն:

 

Անգարան՝ ամերիկեան հանրութիւնը խաբելու եւ մոլորութեան մէջ ձգելու համար, քիւրտերուն դէմ իր պատերազմը սկսելէն քանի մը օր ետք վարձեց «Սքուայըր Փեթըն Պակս» ընկերութիւնը (Squire Patton Boggs) ամսական 32 հազար տոլարով, իբրեւ «Կեփհարթ Կրուփ» (Gephardt Group) հզօր լոպիական ընկերութեան ենթակապալառու: «Սքուայըր Փեթըն Պակս»ի կազմին մէջ են նախկին ծերակուտականներ Թրենթ Լաթ, Ճան Պրօ եւ Սպիտակ տան նախկին պաշտօնեայ Ռապըրթ Քափլա: «Կեփհար»չի թրքական լոպիական խումբը կազմուած է հետեւեալ ենթակապալառուներէն՝ Կրինպըրկ Թրորիկ, Պրայըն Ֆորնի, Լիտիա Պորլընտ եւ «Տիքշթայն Շափիրօ» ընկերութիւն. վերջինը իր լոպիական աշխատակազմին մէջ վերջերս ընդունած է «Սի.Այ.Էյ.»ի նախկին տնօրէն Փորթըր Կասը: Թուրքիոյ կողմէ վարձուած այլ լոպիական ընկերութիւններն են՝ «Կոլտըն Սոլիւշընզ»ը (Goldin Solutions), «Ալփայթաք»ը (Alpaytac), «Ֆին Փարթնըրզ»ը (Finn Partners), «Ֆերահ Օզպեք»ը (Ferah Ozbek) եւ «Կոլին/Հերիս Ինթըրնէյշընըլ»ը (Golin/Harris International): Ըստ Միացեալ Նահանգներու արդարադատութեան նախարարութեան տեղեկութիւններուն՝ Թուրքիա տարեկան շուրջ 5 միլիոն տոլար կը վճարէ այս լոպիական-հանրային կապերու

 

ընկերութիւններուն: Բացի ատկէ, ոչ-շահութաբեր քանի մը ամերիկեան կազմակերպութիւններ իբրեւ ճակատ կը ծառայեն թրքական կառավարութեան՝ Միացեալ Նահանգներու մէջ նպաստելու անոր շահերուն, Քոնկրեսի անդամներն ու լրագրողները հրաւիրելով Թուրքիա՝ ամբողջովին վճարուած զբօսանք-խնճոյքներու համար:

 

Թուրքիոյ համար աշխատող ամերիկեան լոպիիստներէն հաւանաբար ամէնէն վիճայարոյցը Փորթըր Կասն է՝ 2004-2006 թուականներուն «Սի.Այ.Էյ.»ի տնօրէնը, որ համաձայնած է ծախել իր հոգին, հաւանաբար նաեւ Միացեալ Նահանգներու ազգային գաղտնիքները, բուռ մը թրքական լիրայի համար:

 

Յատկանշական է, որ համաձայն «Օտար գործակալներու արձանագրութեան մասին» օրէնքին՝ արդարադատութեան բաժանմունքին Կասի ներկայացուցած զեկոյցին մէջ ան խուսափած է թրքական կառավարութեան կողմէ իր վարձատրութեան վերաբերեալ հարցումին պատասխանելէ: Ան պարզապէս գրած է. «Աշխատավարձը հիմնուած չէ միայն օտար յաճախորդին (Թուրքիա) մատուցուող ծառայութիւններուն վրայ։

Նոյյան տապան  -   Վերլուծություն