ՀՀ գյուղատնտեսության նախարար Սերգո Կարապետյանն այսօր աշխատանքային  այցով եղել է «Երևանի կոնյակի գործարանի» Արմավիրի մասնաճյուղում, որտեղ տրվել է խաղողի մթերման մեկնարկը: Մասնակցում էին նաև Արմավիրի մարզպետ Աշոտ Ղահրամանյանը և «Երևանի կոնյակի գործարան» ՓԲԸ   գործադիր տնօրեն Իգոր Առաքելյանը:

 

Վաղվանից գործարանի Արարատի մասնաճյուղում նույնպես կսկսվի  խաղողի մթերումների գործընթացը, իսկ մեկ շաբաթվա ընթացքում խաղողի մթերման աշխատանքներին կանցնեն արդեն հանրապետության բոլոր մթերող կազմակերպությունները:

 

Նախարարի խոսքով` այս տարի խաղողի բերքն ըստ կանխատեսումների 10-15 տոկոսով կգերազանցի նախորդ տարվա մակարդակը, ուստի բոլոր արտադրողների հետ անհատական աշխատանք է տարվում, որպեսզի ստացված բերքն ամբողջ ծավալով մթերվի:

 

«Անցյալ տարի արտադրվել է 261 հազար տոննա խաղող, որից  184 հազար տոննան մթերվել է: Այս տարի ակնկալում ենք, որ խաղողի արտադրության ծավալները կհասնեն 290-295 հազար տոննայի, մթերման ծավալները  նույնպես ավելանալու են: Ես ուզում եմ հավաստիացնել գյուղացիական տնտեսություններին, որ արտադրված բերքն ամբողջությամբ կմթերվի», - իր խոսքում նշել է նախարար Սերգո Կարապետյանը:

 

Անցյալ տարի մթերվող խաղողի 1 կգ-ի արժեքը  Արարատյան դաշտավայրում կազմել է 150 դրամ, իսկ  Տավուշի մարզում 140 դրամ։  Այս տարի  «Երևանի կոնյակի գործարան» ՓԲԸ-ն կպահպանի նախորդ տարվա գները։   Նախարարությունն հորդորում է մյուս  գինու գործարաններին ևս պահպանել խաղողի  մթերման նախորդ տարվա գները։ 

 

ՀՀ գյուղնախարարության տեղեկատվության և  հասարակայնության հետ կապերի բաժնից հայտնում են՝ գործադիր տնօրեն Իգոր Առաքելյանի փոխանցմամբ՝ թեև իրենց պահանջարկը 30 հազար տոննա է կազմում, սակայն պատրաստ են այս տարի մթերել շուրջ 35 հազար տոննա խաղող, ընդ որում մթերման գնի նվազում չի լինելու:  Նա նաև հավելել է, որ գործարանն իր առանձնահատուկ ուշադրություն կենտրոնում է պահում Տավուշի մարզում խաղողագործության զարգացման հարցերը:  Իգոր Առաքելյանի խոսքով` Տավուշի մարզում այս տարի խաղողի բարձր  բերք է ակնկալվում, և անկախ նրանցից, թե նախապես ինչ ծավալներով են կնքվել պայմանագրերը, իրենք ամեն ինչ կանեն, որպեսզի գյուղացիների ամբողջ բերքը մթերվի: Նա նաև հավելել է, որ ընթացիկ տարում ևս ապառիկ կարգով խաղողագործներին այգիների մշակման համար տրամադրվել են բուժանյութեր` մոտ 250 միլիոն դրամի չափով և այլ աջակցություն:  

 

 

Նոյյան տապան  -   Տնտեսություն