Աշխատանքներ են տարվոմ «Վանաձոր-Քիմպրոմի» աշխատողների աշխատավարձերի կուտակված պարտքերը մարելու ուղղությամբ
22-10-2015 17:19:02 | Լոռու մարզ | Տնտեսություն
Հանրապետության նախագահի հանձնարարությամբ, էներգետիկայի և բնական պաշարների նախարարությունը «Վանաձոր-Քիմպրոմի» բաժնետերերի հետ համատեղ սկսել է միջոցներ ձեռնարկել ձեռնարկության աշխատողների աշխատավարձերի կուտակված պարտքերը մարելու ուղղությամբ։
Նշենք, որ ընկերությունը հոկտեմբերի 1-ի դրությամբ աշխատավարձերի գծով ունի չվճարված 10 ամսվա պարտք, որը կազմում է ընդհանուր առմամբ 337,1 մլն դրամ։
Աշխատավարձի երկու ամսվա պարտքի մարման ֆինանսական խնդիրը լուծված է և վճարումները կատարված են։ Դա հնարավոր է դարձել ձեռնարկության մնացորդային ապրանքային միջոցների վաճառքից գոյացած գումարների հաշվին։
Աշխատավարձի մնացած պարտքը կմարվի մինչև դեկտեմբերի 15-ը։
ՀՀ էներգետիկայի և բնական պաշարների նախարարությունից հայտնում են՝ այդ ընթացքում կիրականացվեն համապատասխան ուսումնասիրություններ «Վանաձոր-Քիմպրոմի» վերաբերյալ և կնախապատրաստվեն առաջարկություններ՝ կառավարություն ներկայացնելու նպատակով։