«Ոսկե գնդակ» 2015. Հայտնի են տարվա լավագույն ֆուտբոլային գործիչների անունները

12-01-2016 12:00:44 | | Սպորտ

Հունվարի 11-ին գերմանական Ցյուրիխ քաղաքում «Ոսկե գնդակի» ամենամյա մրցանակաբաշխության ժամանակ կատալոնական «Բարսելոնայի» և Արգենտինայի հավաքականի հարձակվող Լիոնել Մեսսին ճանաչվեց 2015 թվականի լավագույն ֆուտբոլիստ:

Բարսելոնայի 28-ամյա հարձակվողն աշխարհի լավագույն ֆուտբոլիստի կոչմանն արժանացավ ռեկորդային թվով` 5 անգամ:

Լավագույնի տիտղոսը նվաճելու համար այս տարի արգենտինացու հետ մրցում էին «Բարսելոնայի» բրազիլացի հարձակվող Նեյմարը և «Ռեալ Մադրիդի» պորտուգալացի հարձակվող Կրիշտիանու Ռոնալդոն:

Հիշեցնենք, որ 2015 թվականին «Բարսելոնայի» կազմում Մեսսին դարձել էր Իսպանիայի չեմպիոն, գավաթակիր, Եվրոպայի սուպերգավաթակիր, նվաճել էր Չեմպիոնների լիգայի, ինչպես նաև ակումբային աշխարհի առաջնության գավաթը:

Տեղեկացնենք նաև, որ 2015 թվականի լավագույնների պարգևատրման արարողության ժամանակ լավագույն ֆուտբոլիստուհի է ճանաչվել ԱՄՆ-ի հավաքականի և «Հաուսթոն Դաշ» ակումբի 32-ամյա կիսապաշտպան Կարլի Լոյդը:

Լավագույն մարզչի կոչմանն արժանացել է իսպանական «Բարսելոնա» ֆուտբոլային ակումբը մարզող Լուիս Էնրիկեն, իսկ հունգարացի լեգենդար ֆուտբոլիստ Ֆերենց Պուշկաշի անվան մրցանակը ստացել է տարվա լավագույն գոլի հեղինակ «Գոյնեզիայի» հարձակվող Վենդել Լիրան:

Իսկ ահա տարվա խորհրդանշական հավաքականի կազմն այսպիսի տեսք ունի.

Դարպասապահ – Մանուել Նոյեր («Բավարիա»)

Պաշտպաններ – Դանի Ալվես («Բարսելոնա»), Տիագո Սիլվա (ՊՍԺ), Սերխիո Ռամոս («Ռեալ»), Մարսելո («Ռեալ»)

Կիսապաշտպաններ – Պոլ Պոգբա («Յուվենտուս»), Անդրես Ինյեստա («Բարսելոնա»), Լուկա Մոդրիչ («Ռեալ»)

Հարձակվողներ – Նեյմար («Բարսելոնա»), Կրիշտիանու Ռոնալդու («Ռեալ»), Լիոնել Մեսսի («Բարսելոնա»):

Նոյյան տապան - Սպորտ