ԵՐԵՎԱՆ, 10 ՓԵՏՐՎԱՐԻ, ՆՈՅՅԱՆ ՏԱՊԱՆ: Մարդու իրավունքների պաշտպանության ոլորտը Ադրբեջանը փորձում է վերածել իր տեղեկատվական պատերազմի հիմնական հարթություններից մեկը, եւ շատ դեպքերում Հայաստանի Մարդու իրավունքների պաշտպանը ստիպված է լինում միջազգային ատյաններում խոսել ոչ թե մարդու իրավունքներից, այլ որոշ առումով դառնալ ազգային, քաղաքական գործիչ: Այս մասին փետրվարի 10-ի ասուլիսում հայտարարեց Հայաստանի Մարդու իրավունքների պաշտպան Արմեն Հարությունյանը: «Մենք տոտալ ինֆորմացիոն պատերազմի մեջ ենք գտնվում, եւ ես կոչ եմ անում ամբողջ հանրությանը իրոք հաշվի առնել դա եւ մեկ բռունցք դառնալ»,- ասաց նա, հավելելով. «Մենք ուզենք, թե չուզենք յուրաքանչյուրս պետք է կարողանանք սատար կանգնել նաեւ մեր ազգային շահերին, որովհետեւ մարդու իրավունքները եւ ազգային, պետական շահերը միահյուսված են»: Միաժամանակ Ա.Հարությունյանը նշեց, որ այդ միասնությունը չպետք է լինի մեխանիկական. պետական ապարատը պետք է իրոք շրջվի դեպի շարքային քաղաքացին: Պաշտպանը հիշեցրեց, որ ամիսներ առաջ Լեռնային Ղարաբաղի օմբուդսմանը դարձել է Եվրոպական օմբուդսմանի ինստիտուտի անդամ, ինչից հետո Ադրբեջանը իր դեսպանատների, այլ երկրների խորհրդարանների եւ բարեկամների միջոցով «շատ լուրջ հարձակումներ էր սկսել»` փորձելով հասնել Ղարաբաղի օմբուդսմանի անդամակցության չեղյալ համարվելուն, սակայն ապարդյուն: «Դա պատճառ դարձավ, որ մենք ընդհանրապես քննարկենք մնացած չճանաչված երկրների օմբուդսմանների անդամակցության որեւէ մի տարբերակ, որովհետեւ մարդու իրավունքները քաղաքական կոնյուկտուրայից վեր են»,- ասաց Ա.Հարությունյանը, ընդգծելով, որ «դե ֆակտո» ձեւավորված, սակայն «դե յուրե» չճանաչված պետություններում եւս կան մարդու իրավունքների խնդիրներ, ուստի եւ դրանք քննարկելու եւ լուծելու անհրաժեշտություն:

---