Նոյեմբերի 18-ին և 19-ին Դիլիջանում կանցկացվի 4-րդ ամենամյա Բիզնես ինովացիոն ֆորումը
15-11-2016 14:56:41 | Հայաստան | Կազմակերպություններ
Նոյեմբերի 18-19-ը Դիլիջանում «Հայաստան 20.18 - 2018թ.՝ Հայաստանը 20 ամենանորարար երկրների շարքում» խորագրի ներքո կանցկացվի 4-րդ ամենամյա Բիզնես ինովացիոն ֆորումը: Այս և օրակարգային այլ հարցերի շուրջ այսօր լրագրողների հետ հանդիպմանը խոսել են Բիզնես ինովացիոն ֆորումի կազմակերպիչ՝ Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը, ՀՀ Տնտեսական զարգացման և ներդրումների փոխնախարար Էմիլ Տարասյանը, Մոտիտիս ընկերության տնօրեն՝ ինովացիոն ֆորումի մոդերատոր Րաֆֆի Քասարջյանը, Հայաստանում Եվրոպական միության պատվիրակության Միջազգային օգնության/համագործակցության պատասխանատու Լյուդովիկ Չեխանովսկին և Եվրոպական Միության ու Գերմանիայի տնտեսական համագործակցության և զարգացման դաշնային նախարարության ֆինանսավորմամբ ու «Մասնավոր հատվածի զարգացում Հարավային Կովկասում» ծրագրի կողմից իրականացվող «Աջակցություն ՓՄՁ զարգացմանը Հայաստանում» ծրագրի միջազգային խորհրդատու Պիեռ Պրիվիխը:
Երկօրյա ինովացիոն ֆորումին աջակցություն է ցուցաբերվել «ԵՄ-ն բիզնեսի համար» և «ԵՄ-ն նորարարության համար» նախաձեռնությունների շրջանակում: Այն բացառիկ հարթակ է, որտեղ մասնագետների թեմատիկ քննարկումների, գործարար ներկայացումների և շփումների միջոցով կներկայացվի ինովացիոն զարգացման առաջավոր փորձը, կծավալվի գործնական քննարկում շահագրգիռ կողմերի մասնակցությամբ, ինչպես նաև կմշակվի օրակարգ՝ 2018 թվականին Հայաստանը աշխարհի 20 ամենանորարար երկրների շարքում դիրքավորելու համար:
Բիզնես ինովացիոն ֆորումին կմասնակցեն տեղական և միջազգային հեղինակավոր ընկերությունների ներկայացուցիչներ և փորձագետներ: Ինովացիոն ֆորումի հիմնական թեմաներն են՝
•Նորարարական ապրանքներ և ծառայություններ
•Բիզնես պրոցեսների զարգացում ինովացիաների միջոցով
•Գիտելիքներ նորարարության և զարգացման համար
•Ռազմավարություն՝ դեպի ինովացիոն տնտեսություն
Բիզնես ինովացիոն ֆորումի բանախոսների ցանկը, ինչպես նաև մասնակցության ու գրանցման պայմանները ներկայացված են BIF.am կայքում:
Բիզնես ինովացիոն ֆորումն ավանդաբար իրականացվում է ԻՏՁՄ-ի կողմից՝ ՀՀ վարչապետի բարձր հովանու ներքո: Ֆորումի հովանավորն է «Աջակցություն ՓՄՁ զարգացմանը Հայաստանում» ծրագիրը, որն իրականացվում է Եվրոպական Միության և Գերմանիայի տնտեսական համագործակցության ու զարգացման դաշնային նախարարության ֆինանսավորմամբ և «Մասնավոր հատվածի զարգացում Հարավային Կովկասում» ծրագրի կողմից: