Հայաստանի եւ Թուրքիայի միջեւ հարաբերությունների հաստատումը
վտանգավոր է Հայաստանի ժողովրդի համար,- գտնում է Ալեք Ենիգոմշյանը
20-11-2009 15:54:00 | Հայաստան | Քաղաքական
ԵՐԵՎԱՆ, 20 ՆՈՅԵՄԲԵՐԻ, ՆՈՅՅԱՆ ՏԱՊԱՆ: «Հայոց ցեղասպանությունը
առ այսօր Թուրքիայի կողմից շարունակում է մնալ չճանաչված,
Արեւմտյան Հայաստանը` բռնազավթված, իսկ Սփյուռքի իրավունքները`
ոտնահարված»,- նոյեմբերի 20-ի քննարկմանը հայտարարեց «Մոնթե
Մելքոնյան» հիմնադրամի տնօրեն Ալեք Ենիգոմշյանը: Նա նշեց, որ
հայ-թուրքական շարունակվող հակամարտության պայմաններում երկու
երկրների միջեւ դիվանագիտական հարաբերությունների հաստատումը
վտանգավոր է Հայաստանի ժողովրդի համար: Այդ հարաբերությունների
կարգավորումը, ըստ Ա.Ենիգոմշյանի, ձեռնտու է միայն Հայաստանի իշխող
վարչախմբին` ինչպես սեփական բիզնեսն ընդլայնելու, այնպես էլ
արտաքին աշխարհի աչքում բարձրանալու առումով:
Նա հավելեց, որ հայ-թուրքական հարաբերությունների հաստատման
հեռանկարից խուսափելու համար Հայաստանը նախեւառաջ պետք է լուծի իր
ներքին քաղաքական, սոցիալական եւ բարոյահոգեբանական խնդիրները:
«Մեր գլխավոր խնդիրը երկրի ներքին առողջացումն է»,- նշեց
Ա.Ենիգոմշյանը` նկատելով, որ ներկայիս ընդդիմությունը չի կարող
լուծել այդ խնդիրը, եւ հետեւաբար «պետք է կազմակերպվեն» առաջադեմ,
հայրենասեր ուժերը:
«Սարդարապատ» շարժման կազմկոմիտեի անդամ, կինոռեժիսոր Տիգրան
Խզմալյանը նշեց, որ Թուրքիան վերջին տասնամյակում մեծ խնդիրներ
ունի ազգային փոքրամասնությունների հետ: «Այն, ինչ մենք հիմա
անվանում ենք «Թուրքիա», վերացական հասկացություն է, քանի որ
Արեւմտյան Հայաստանի մեծ մասը բնակեցված է քրդերով»,- ասաց նա:
Տ.Խզմալյանի դիտարկմամբ, անհրաժեշտ է մշակել ծրագիր, որը թույլ կտա
ընդհանուր շահեր գտնել Թուրքիայի ազգային փոքրամասնությունների,
այդ թվում` համշենահայերի հետ:
«Հայ կամավորականների համախմբում» նախաձեռնության համակարգող
Ժիրայր Սեֆիլյանի խոսքերով, վերջին ամիսներին իշխանությունները
փորձում էին ապացուցել, թե իբր հայ ժողովրդի մեծ մասը կողմ է
հայ-թուրքական հարաբերությունների կարգավորմանը: «Մենք պետք է մի
ձեւ գտնենք իրական պատկերը ցույց տալու, ժողովրդի իրական տեսակետը
բարձրաձայնելու համար, եւ դա անենք այնպես, որ այլեւս ոչ ոք
կասկածի տակ չդնի այդ տեսակետը»,- ասաց Ժ.Սեֆիլյանը: