Հայաստանի արտգործնախարարությունում տեղի են ունեցել
հայ-չեխական քաղաքական խորհրդակցություններ
10-11-2009 16:16:00 | Հայաստան | Քաղաքական
ԵՐԵՎԱՆ, 10 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանի ԱԳՆ-ում
նոյեմբերի 9-ին կայացել են հայ-չեխական քաղաքական
խորհրդակցություններ` արտաքին գերատեսչությունների վարչության
պետերի մակարդակով:
Կողմերը քննարկել են քաղաքական երկխոսությանը, առեւտրային
կապերի եւ ներդրումների խրախուսմանը, միջազգային
կազմակերպություններում երկկողմ համագործակցությանը,
տարածաշրջանային անվտանգության խնդիրներին, ինչպես նաեւ
Հայաստան-ԵՄ հարաբերություններին առնչվող հարցերի լայն շրջանակ:
Գոհունակությամբ նշվել է երկկողմ քաղաքական շփումների ներկա
մակարդակը եւ դրանք հետեւողականորեն զարգացնելու
անհրաժեշտությունը: Կողմերը համաձայնել են ընդլայնել երկկողմ
իրավապայմանագրային դաշտը, նպաստել երկու երկրների միջեւ գործարար
կապերի զարգացմանը, շարունակել համագործակցությունը ԵՄ Արեւելյան
գործընկերության շրջանակներում:
Ըստ ՀՀ ԱԳՆ Մամուլի եւ տեղեկատվության վարչության
հաղորդագրության, նույն օրը չեխական պատվիրակությանն ընդունել է ՀՀ
արտգործնախարարի տեղակալ Կարինե Ղազինյանը: Հանդիպմանը մտքեր են
փոխանակվել ԵՄ Արեւելյան գործընկերության շրջանակներում
փոխգործակցության վերաբերյալ, նշվել է մարդկային շփումների
խրախուսման կարեւորությունն ինչպես երկկողմ, այնպես էլ բազմակողմ
ձեւաչափերում:
Չեխական կողմի խնդրանքով ներկայացվել են հայ-թուրքական
հարաբերությունների կարգավորման գործընթացի զարգացումները: