Հայաստանի եւ Լատվիայի նախագահները մասնակցեցին Մատենադարանի
հիմնադրման 50-ամյա տարեդարձին նվիրված հանդիսությանը
09-12-2009 21:00:00 | Հայաստան | Քաղաքական
ԵՐԵՎԱՆ, 9 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 9-ին
Երեւանում տեղի ունեցավ հոբելյանական հանդիսություն` նվիրված
Մաշտոցի անվան հին ձեռագրերի գիտահետազոտական ինստիտուտի
(Մատենադարան) հիմնադրման 50-ամյակին: Հանդիսությանը ներկա էին
Հայաստանի նախագահ Սերժ Սարգսյանը եւ եռօրյա պետական այցով
Հայաստան ժամանած Լատվիայի նախագահ Վալդիս Զատլերսը:
Մատենադարանի տնօրեն Հրաչյա Թամրազյանը նշեց, որ Մատենադարանը
գործարար Սերգեյ Համբարձումյանի բարեգործության շնորհիվ շուտով
կվերաճի նոր գիտահետազոտական խոշոր համալիրի` ներկայիս տարածքից 3
անգամ ավելի մեծով:
Ամենայն Հայոց կաթողիկոս Գարեգին Երկրորդը գոհունակություն
հայտնեց, որ երկրի իշխանությունները խնամքով են վերաբերվում
թարգմանական, գիտական եւ գրական մեծ ժառանգություն պահպանող
Մատենադարանին: