Այաթոլա Խամենեին Իրանի գլխավոր և վտանգավոր թշնամի է համարում ԱՄՆ-ին
02-11-2017 17:03:15 | Հայաստան | Միջազգային
Իրանի ղեկավար և հոգևոր առաջնորդ Ալի Խամենեյը գտնում է, որ Իսլամական հանրապետության գլխավոր թշնամին ԱՄՆ-ն է:
Tass-ի փոխանցմամբ՝ այդ մասին նա հայտարարել է երիտասարդների հետ հանդիպման ժամանակ:
«Մեզ համար ԱՄՆ-ն գլխավոր և վտանգավոր թշնամի է, և սա հոռետեսական տեսակետ չէ, այլ եզրահանգում՝ հիմնված փորձի վրա»,- ասել է Խամենեյը:
Վերջինս նաև մեկնաբանել է ԱՄՆ նախագահ Դոնալդ Թրամփի՝ Թեհրանի հասցեին հնչած այն մեղադրանքները, թե իբր Իրանն աջակցում է ահաբեկչությանը, և ասել.
«Այդ հիմար հայտարարությունը ցույց է տալիս ամերիկացիների թշնամական վերաբերմունքը ոչ միայն իրանական պետության, այլև ամբողջ ժողովրդի նկատմամբ»:
Նրա խոսքերով՝ Վաշինգտոնն այդպես էլ չի կարողանում ընդունել այն փաստը, որ հնարավոր չէ վերացնել հարուստ պատմություն և մշակութային ժառանգություն ունեցող ազգին:
Իրանի հոգևոր առաջնորդի կարծիքով՝ իրանցի ժողովրդի նկատմամբ ԱՄՆ-ի նման թշնամական վերաբերմունքն արդյունք է «ամերիկացիների կուրության» և սեփական սխալ հաշվարկների, իսկ այդ թշնամությունն ի հայտ է եկել 1979 թվականի Իսլամական հեղափոխությունից հետո:
ՀԱՅԵՐԵՆ
Русский
English
Դաս. հայերեն
French
