ԱՄՆ-ում «Մայքլ» փոթորիկն ավերել է ռազմաօդային բազան, բազմատոննանոց ինքնաթիռները թղթե խաղալիքների նման դեսուդեն շպրտել (տեսանյութեր և ֆոտոշարք)

14-10-2018 01:30:25 | ԱՄՆ | Միջազգային

Տարերային աղետի հետևանքով Միացյալ Նահանգներում զոհերի թիվն արդեն հասել է 16-ի ու դեռ կարող է ավելանալ:

Փոթորկից ամենից շատ տուժել են ամերիկյան Վիրջինիա նահանգն ու Ֆլորիդա նահանգի հյուսիսարևմտյան հատվածները: Փոթորիկն ավերել է բազմաթիվ տներ և առանց էլեկտրաէներգիայի թողել ավելի քան 1.5 միլիոն մարդու:

«Մայքլն» ԱՄՆ-ի պատմության մեջ արդեն 4-րդ ամենահզոր փոթորիկն է համարվել, այն երկրի երեսից ջնջել է արդեն մի քանի քաղաքներ, Ֆլորիդա նահանգում ավերել Տինդալլի ռազմաօդային բազան, բազմատոննանոց ինքնաթիռները թղթե խաղալիքների նման դեսուդեն շպրտել:

Ռազմաօդային բազայի հրամանատար Բրայանա Լեյդլոուն Ֆեյսբուքում հիշյալ ռազմական օբյեկտի պաշտոնական էջում հայտնել է, որ բազայի յուրաքանչյուր շինություն այս կամ աստիճանի վնասվածք է ստացել, դրանցից մի քանիսը ոչնչացել են ամբողջությամբ: Ավերված են թռիչքավայրէջքուղին, ինչպես նաև ինքնաթիռների կայանավայրերը դրանց նորոգարանների հետ միասին:

«Մայքլն» ամենահզոր փոթորկին ընդամենը մեկ աստիճանով է զիջում, այն դասակարգվել է որպես 4-րդ կատեգորիայի: