ՖԱԹՀ-ի եւ ՀԱՄԱՍ-ի բախումների ժամանակ զոհվել է 6 մարդ
02-06-2009 19:38:00 | | Միջազգային
ՌԱՄԱԼԼԱՀ, 2 ՀՈՒՆԻՍԻ, ՆՈՅՅԱՆ ՏԱՊԱՆ: Առնվազն վեց մարդ է
զոհվել Հորդանան գետի արեւմտյան ափին պաղեստինյան ոստիկանության եւ
ՀԱՄԱՍ իսլամիստական շարժման զինյալների միջեւ բախումների ժամանակ:
Սպանվածներից երեքը Պաղեստինի ազգային վարչակազմի ղեկավար,
ՖԱԹՀ շարժման առաջնորդ Մահմուդ Աբբասին լոյալ ուժային կառույցների
աշխատակիցներ են, երկուսը` ՖԱԹՀ-ի հետ մրցակցող ՀԱՄԱՍ շարժման
զինյալներ, վեցերորդը` խաղաղ բնակիչ:
Կալկիլիա քաղաքի մարտը ամենամասշտաբային զինված բախումն է
եղել ՖԱԹՀ-ի եւ ՀԱՄԱՍ-ի կողմնակիցների միջեւ Հորդանան գետի
Արեւմտյան ափին: Նախկինում հակամարտությունը երկու շարժումների
միջեւ նման ձեւով արտահայտվել էր միայն Գազայի հատվածում, որտեղ
իսլամիստները երկու տարի առաջ հեղաշրջում կազմակերպեցին եւ
տապալեցին ՖԱԹՀ-ականներին: