Հայաստանի էկոնոմիկայի նախարարությունը օտարերկրյա
լրագրողների համար կազմակերպում է ճանաչողական այց Հայաստան
27-05-2009 20:00:00 | Հայաստան | Տնտեսություն
ԵՐԵՎԱՆ, 27 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի Էկոնոմիկայի
նախարարության եւ Զբոսաշրջության համաշխարհային կազմակերպության
համագործակցության շրջանակներում ճանաչողական այցով Հայաստան
կժամանեն օտարերկրյա լրագրողներ: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեց նախարարության Զբոսաշրջության եւ տարածքային տնտեսական
զարգացման վարչության պետ Մեխակ Ապրեսյանը, լրագրողների այցը
Հայաստան նախատեսվում է մայիսի 29-ին:
Ըստ Մ.Ապրեսյանի, եվրոպական տարբեր երկրներից ժամանած
լրագրողները կայցելեն Հայաստանի պատմամշակութային վայրեր,
թանգարաններ: Նրա խոսքերով, այցի նպատակն է օտարերկրացի
լրագրողներին Հայաստանի զբոսաշրջային հնարավորություններին
ծանոթացնելը, որոնց վերաբերյալ հետագայում նրանք աշխարհի տարբեր
երկրների լրատվամիջոցներով կներկայացնեն իրենց տպավորությունները:
«Սա եւս մեկ առիթ է օտարերկրյա լրագրողներին ներկայացնելու, թե
Հայաստանում ինչպիսի պայմաններ են ստեղծված զբոսաշրջիկների համար,
ինչ ծրագրեր է իրականացվում ոլորտի զարգացման ուղղությամբ»,- ասաց
Մ.Ապրեսյանը:
Նա նշեց, որ ներկայումս բանակցություններ են վարվում այս տարի
նաեւ Հայաստան օտարերկյա զբոսաշրջային օպերատորների
այցելություններ կազմակերպելու վերաբերյալ: