Հայաստանի եւ Իրանի արտգործնախարարները բարձր են գնահատում
երկկողմ հարաբերությունները
13-03-2009 16:30:00 | Հայաստան | Քաղաքական
ԵՐԵՎԱՆ, 13 ՄԱՐՏԻ, ՆՈՅՅԱՆ ՏԱՊԱՆ: Մարտի 13-ի համատեղ
ասուլիսում Հայաստանի եւ Իրանի արտգործնախարարներ Էդվարդ
Նալբանդյանը եւ Մանուչեհր Մոթթաքին բարձր գնահատեցին երկկողմ
հարաբերությունները:
Ասուլիսին նախորդող հանդիպմանը քննարկվել են երկկողմ
հարաբերություններին, տարածաշրջանային կայունությանը վերաբերող
հարցեր: Է.Նալբանդյանը իրանցի գործընկերոջը ներկայացրել է
ղարաբաղյան հակամարտության կարգավորման գործընթացի վերջին
զարգացումները:
Մ.Մոթթաքին, գոհունակություն հայտնելով հայ-իրանական
հարաբերություններից, միաժամանակ նշեց, որ նկատի ունենալով առկա
հնարավորությունները, այնուամենայնիվ բավարար չի համարում
հարաբերությունների ներկայիս մակարդակը: Ըստ նրա, եթե կյանքի
կոչվեն երկկողմ պայմանավորվածությունները, ապա հայ-իրանական
հարաբերություններն ավելի կզարգանան:
Ղարաբաղյան հակամարտության խաղաղ կարգավորման հարցի
առնչությամբ Մ.Մոթթաքին նշեց, որ Իրանը իր դիրքորոշումը
ներկայացրել է Հայաստանի եւ Ադրբեջանի իշխանություններին: Ըստ նրա,
Իրանը պատրաստ է օժանդակել Ղարաբաղյան հակամարտության խաղաղ
լուծմանը, ինչը արժանանացել է թե' Հայաստանի, թե' Ադրբեջանի
հավանությանը: Սակայն Ղարաբաղի հակամարտությունը այն խնդիրներից է,
որոնք, Մ.Մոթթաքիի խոսքերով, կարող են կարգավորվել միայն «աղյուսը
աղյուսի վրա դնելով, որպեսզի ստացվի ամբողջական շենք»:
Իրանի արտգործնախարարը նաեւ տեղեկացրեց, որ վերջերս Իրանում
տեղի է ունեցել Տնտեսական գործակցության երկրների վեհաժողովը, որին
մասնակցել է նաեւ Ադրբեջանը: Վեհաժողովը ընդունել է
հակամարտությունների վերաբերյալ հռչակագիր, որում նշվում է, որ
տարածաշրջանային հակամարտությունները պետք է կարգավորվեն խաղաղ եւ
բանակցային ճանապարհով:
Ասուլիսում անդրադարձ եղավ նաեւ իրանա-ամերիկյան
հարաբերություններին: Իրանի արտգործնախարարը նշեց, որ Իրանը
ամերիկյան նոր վարչակազմից սպասում է նոր քաղաքականության
գործնական դրսեւորում: Ինչ վերաբերում է այն հարցին, թե արդյո՞ք
պատրաստ է Իրանը ԱՄՆ-ի հետ ուղիղ բանակցությունների, ապա
Մ.Մոթթաքին նշեց, որ իրենք «սպասում են` տեսնեն, թե գործնական ինչ
փոփոխություններ են կատարվելու ԱՄՆ-ի քաղաքականությունում»: