Հայտնի են ձյան վոլեյբոլի Հայաստանի առաջնության մրցանակակիրները
25-01-2021 18:26:53 | Կոտայքի մարզ | Սպորտ
Հունվարի 22-24-ը Ծաղկաձորում տեղի է ունեցել Հայաստանի ձյան վոլեյբոլի առաջնությունը, որն ընդգրկված է միջազգային ֆեդերացիայի վարկանիշային մրցաշարերի ցանկում: Առաջնությանը մասնակցել են կանանց 10 և տղամարդկանց 12 թիմ:
Տղամարդկանց մրցաշարում մրցանակային տեղերը զբաղեցրել են Հայաստանի ֆիզիկական կուլտուրայի և սպորտի պետական ինստիտուտի մարզական ակումբի թիմերը. եզրափակիչում ՖԻՄԱ-1-ը 2:0 հաշվով հաղթել է ՖԻՄԱ-3-ին, իսկ երրորդ տեղի համար խաղում ՖԻՄԱ-2-ը կրկին 2:0 հաշվով առավելության է հասել ՀՊՏՀ-ի (Հայաստանի պետական տնտեսագիտական համալսարան) թիմի նկատմամբ:
Կանանց մրցաշարում առաջին տեղը գրավել է «Վան-1»-ը, որը եզրափակիչ խաղում 2:0 հաշվով հաղթել է «Ավան-1»-ին: Երրորդ մրցանակակիր է դարձել «Վան-2» թիմը, որը մեդալային խաղում նույն 2:0 հաշվով առավելության է հասել «Վբեթ-2»-ի նկատմամբ:
Հայաստանի վոլեյբոլի ֆեդերացիան մրցանակակիր թիմերին պարգևատրել է գավաթներով, մեդալներով, պատվոգրերով և նվերներով:
Նշենք, որ Հայաստանն առաջին երկիրն է, որ այս տարի արդեն անցկացրել է ձյան վոլեյբոլի առաջնությունը: Փետրվարին նմանօրինակ առաջնություն անցկացնելու մտադրության մասին հայտնել է Ռումինիան:
Հավելենք նաև, որ փետրվարին Ծաղկաձորում անցկացվելու է Հայաստանի վոլեյբոլի 15 տարեկանների առաջնությունը, որը նոյեմբերին Հայաստանում կայանալիք Եվրոպայի առաջնության առաջին փուլի նախապատրաստության մի մասն է լինելու:
ՀԱՅԵՐԵՆ
Русский
English
Դաս. հայերեն
French
