ԵՐԵՎԱՆ, 26 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Սփյուռքի
նախարարությունը 2009թ.-ի ծրագրերից առավել կարեւորում է
համահայկական համաժողովների անցկացումը: Այս մասին դեկտեմբերի 26-ի
ամփոփիչ ասուլիսում հայտնեց նախարար Հրանուշ Հակոբյանը` հավելելով,
որ գալիք տարվա ապրիլին նախատեսվում է անցկացնել հայ
ճարտարապետների, սեպտեմբերին` հայ իրավաբանների, այնուհետեւ`
Հայաստանում բարձրագույն ուսումնական հաստատություն ավարտած
սփյուռքահայերի համաժողովներ: Բացի այդ, ըստ Հ.Հակոբյանի,
անհրաժեշտ է կազմակերպել միջոցառումներ` նվիրված Հայաստանի ազգային
հերոսներ Շառլ Ազնավուրին, Քըրք Քըրքորյանին եւ Ալեք Մանուկյանին`
նրանց թե' երկրում, թե' Սփյուռքում «պատշաճ կերպով ներկայացնելու
համար»:
2009թ.-ին իրականացվելիք կարեւորագույն ծրագիրը, ըստ
Հ.Հակոբյանի, լինելու է Սփյուռք-Հայաստան համագործակցության
շրջանակներում մասնագիտական համահայկական ցանցի ստեղծումը: Այդ
ցանցի շնորհիվ, նրա համոզմամբ, հնարավոր կլինի արդյունավետ
օգտագործել ազգի մտավոր ներուժը:
Նախարարը հայտնեց, որ գործունեության երեք ամիսների ընթացքում
նախարարությունը մշակել եւ տարբեր գերատեսչությունների ու
հայաստանյան եւ սփյուռքի կազմակերպությունների դատին է ներկայացրել
«Հայաստան-Սփյուռք գործակցության զարգացման» հայեցակարգի նախագիծը:
Դրա վերաբերյալ, Հ.Հակոբյանի խոսքերով, աշխարհի տարբեր
անկյուններից ստացվել են դրական արձագանքներ: Նախագիծը 2009թ.-ի
փետրվարին կներկայացվի ՀՀ կառավարության հաստատմանը:
Հ.Հակոբյանը հայտնեց նաեւ, որ ուսումնասիրվել է տարբեր
երկրների, մասնավորապես Հունաստանի, Սերբիայի, Հնդկաստանի,
Իսրայելի, սփյուռքի հետ աշխատանքների կազմակերպման փորձը: Օրինակ,
Հունաստանի փորձը, ինչպես ընդգծեց նախարարը, Հայաստանին անհրաժեշտ
կլինի սփյուռքահայության վերաբերյալ օրենքներ ընդունելիս: Կատարված
աշխատանքներից Հ.Հակոբյանը մատնանշեց նաեւ Սփյուռքում եւ
Հայաստանում «Հայերն առանց ծխախոտի» շարժումը սկսելը, համահայկական
օլիմպիական խաղերի նախապատրաստումը: