Ընդդիմադիր կուսակցությունները պահանջել են Էրդողանին հեռացնել ընտրապայքարից
28-03-2023 15:55:20 | Հայաստան | Ի՞նչ է գրում մամուլը
Sputnik. Ընդդիմությունը կարծում է, որ Թուրքիայի առաջնորդը խախտում է երկրի մայր օրենքը։
Երեք ընդդիմադիր կուսակցություններ պահանջել են, որ բարձրագույն ընտրական հանձնաժողովը Թուրքիայի գործող նախագահ Ռեջեփ Թայիփ Էրդողանին հեռացնի նախագահի պաշտոնի համար մրցավազքից։ Տեղեկությունը հայտնում է «Haberturk» հեռուստաալիքը:
Հանձնաժողովին բողոք են ներկայացրել «Լավ», DEVA և Memleket կուսակցությունները։ Նրանց կարծիքով՝ Էրդողանը, երրորդ անգամ առաջադրելով իր թեկնածությունը, խախտում է Սահմանադրությունը, որովհետև մայր օրենքը առավելագույնը երկու նախագահական ժամկետ է թույլ տալիս։
«Էրդողանին նախագահի թեկնածու առաջադրելու համար որևէ խոչընդոտ չկա։ Մենք արդեն մի քանի ամիս առաջ ասել ենք, որ նա մեր թեկնածուն է և գրանցել ենք նրան բոլոր կանոններին համապատասխան», - իր հերթին նշել է իշխող «Արդարություն և զարգացում» կուսակցության պաշտոնական ներկայացուցիչ Օմեր Չելիքը։
Հիշեցնենք, որ Թուրքիայում մայիսի 14–ին կայանալու են նախագահական և խորհրդարանական ընտրություններ։ Գործող նախագահ Ռեջեփ Թայիփ Էրդողանը պաշտոնապես դիմել է ԿԸՀ առաջիկա ընտրություններում որպես նախագահի թեկնածու գրանցվելու համար։ Նրա առաջադրման մասին հայտարարությունը հանձնաժողովին են ներկայացրել իշխող «Արդարություն և զարգացում» կուսակցությունն ու նրա հետ դաշինքի մեջ գտնվող «Ազգայնական շարժում» կուսակցության խորհրդարանական խմբակցությունների ներկայացուցիչները։ Էրդողանի հիմնական մրցակիցը լինելու է ընդդիմության կողմից առաջադրված «Ժողովրդական դաշինքի» միասնական թեկնածու Քեմալ Քըլըչդարօղլուն։
ՀԱՅԵՐԵՆ
Русский
English
Դաս. հայերեն
French
